Auleria Wakudumo
Minista wounamapya, omeva nomatalululo omadu Calle Schlettwein okwa pula oohandimwe nomahangano a wedwa po ku tulwe oukuni kumwe oku kwatela po omeva molwa onghalo yomhepo oyo hai lunduluka nokueta enota kohainga.
Edi oda shiivifwa komukulunhuwiliki mouministeli wounamapya Ndiyapuki Nghituwamata pefimbo a lesha oshipopiwa shominista momutumba womafiku atatu koKeetmanshop.
“Oku kwatela po omeva moshilongo itaku dulu okuwanifwa po kouministeli auke. Okwa pumbwa elongelo nelitulemo okudja kufyeni atushe: epangelo, omahangano opaumwene, ovakwashiwana aveshe mwa kwatelwa ava veli koshi yomalelo opamufyuululwakalo. Atushe otwa pumbwa okutula oukuni kumwe okukaleka po omeva fiyo epupi tali ya,” Schlettwein ta ti.
Minista okwa weda po ta ti oshiwana nashi tameke okulongifa omikalo dopaungoba mokukaleka po omeva novakwashiwana tava kala vena omeva ma yela.
Ta popi pomutumba omo tuu omo, ngoloneya woshitukulwa shaMaheke Pijoo Nganate okwa indila epangelo li shunife ofuto yomeva momaumbo keshe pedu opo ovakwashiwana va kale tava dulu okufuta nokukala vehena eendjo domeva.
“Onda hala tu kufe oshihopaenenwa koshishiindalongo shetu South Africa omo eumbo keshe hali pewa eelitela domeva 10 oshali unene moTseiblaagte, Epako, noAimablaagte mOsoweto,” Nganate ta ti.
Nganate okwa weda po ta ti ota pula epangelo li shunife oimaliwa yomeva hai futwa kovakwashiwana pedu shaashi okwa mona ovakwashiwana vahapu tava mono oixuna.
“Odola imwe meecubiki 20 domeva otai dulu okukala yafa kaina ondilo ashike onda mona ovanhu tava nyengwa nokulanda ekaya lina ashike nalo odola. Oto lipula ngaashi ovanhu ava vehena oilonga kutya ohava xupu ngahelipi okufuta oipumbiwa yomomaumbo ngaashi omeva,” Nganate ta ti.