Abraham Mwanyekange 

Omushikingalo Melekisedek Nakalemo (32), a shivika nedina Zulla okwa ti okwa pitifa okangalo kamwe kaye petameko lodula manga ta shuna mostudio a ka manufulule okakaseta ke liwana po omo a ti ota ka kala ka pwa muJuni odula ei. 

Zulla, odalele yokOmahenge aShaduka moshitopolwa shaHangwena, okwa ti ota ka longa novashikingalo Ovanamibia ngaashi, D-Kandjafa, K-dio, Drawer naKastyle Ndonga Boy. “Onde mu pa ko ashike koxulo yonguto mu tale ngeenge omunghoka owa fingala ngoo nawa manga andi ka teta eenyanga ame ndi wede mo oinyenyepeki aishe nawa nale,” Zulla ta ti. Okwati okangalo oko apitifa otaka ufanwa “Happy New Year 2026. okangalo okapita mwa 02 January 2026. Noka producer Mo studio ya VussyBeatz mombaye. 

“Elalakano lokangalo okutwa omukumo, nokweeta ovanhu pamwe opo tu longe nuudiingi omanga tu li petameko lodula, tuhamane po efimbo fye tu ke li lye ominwe odula ya pwa ko ndele katu na eshi twa longa po”, Zulla ta ti. Okwa ti okwa hala keshe ou ta ka pwilikina okangalo kaye e lilongekidile nawa odula opo eshi tai ke ya pehulilo a mone kutya oilalakanenwa yaye okwe i pondola noku i tula moilonga. 

Zulla okwa ti oha imbi oAfro-Pop noKwaito omo a ti oha pitifile mo etumwalaka li na sha nonghalamwenyo, okuhonga, okupukulua nokutwa Ovanamibia omukumo unene ovo tava pitile momaupyakadi efiku nefiku. “Eengalo ohadi velula nokudenga po oudja”, ta ti. 

Nonande tave shi endifa nawa moshikondo sheengalo Zulla okwa ti Ovanamibia vamwe ohava sheke ovashikingalo vambulavo vo tava fimaneke vokondje yoshilongo. “Yambulei po Ovanamibia vakweni ovo tava kondjifa ndele inamu va lyatela pedu”, ta indile. 

Zulla okwa indila ovashikingalo vakwao opo va longele kumwe vo va twale eengalo daNamibia kondje yoshilongo. 

-abbenghilai@gmail.com