Auleria Wakudumo 

Omushangi weefilima Levos Panduleni Ekandjo okwa holola kutya euliko lofilima yavo yedina ‘The Hustlers Curse’ osho sha hala okutya efingo lomunyangadali oya kufa vahapu koipundi mOutapi. 

Ofilima oya li ya fanekelwa modoolopa yOutapi odula ya dja ko okudja mo17 fiyo 23 Desemba noya ulikwa Omaandaxa moMulti purpose mOutapi. 

Ovanhu vahapu, mwa kwatelwa ovanafikola osho yo ovaleli ngaashi ngoloneya mukulu woshitukulwa shaMusati Erginus Endjala ova li va holoka momwaalu muhapu okutala nghene ovanyandi veshi denga komutwe. 

Konima yokutala ofilima, vahapu oveli shangifa opo va pewe owino mokunyanda, okushanga oshoyo okufaneka ofilima. 

Ekandjo okwa ti ovadali vahapu ova tokola okushangifa ovana opo navo va kale hava nyande oinyandwa neefilima. 

“Onda kwa twa kedilaadilo lokutota ongudu yovadeulwa. Ohandi kala hadi va deulile okushanga, okufaneka oyo okunyanda,” Ekandjo ta holola ngaho. 

Ekandjo okwa holola kutya ondjodi yaye oya ningwa yoshili kehangano leefilima moNamibia oyo hai ufanwa oNamibia Film Production okupitila moproyeka yaye yoKina Namibia eshi a li a kufa ombinga momafiyafano omushangi weefilima a li a ningwa omwedi wa dja ko mOshakati. 

Oproyeka ei ohai ende needoolopa di lili noku lili, tai kongo ovashangi novakufimbinga dingi mokushanga eefilima keshe kodula. 

Mo2025 eshi ye ya mOshakati, Ekandjo okwa ti ina shi mu fiya momutumba. Okwa tavakana okudja kOutapi fiyo Oshakati opo a kufe ombinga mefiyafano eli. Eshi Kalunga iha dipayelwa ovana, Ekandjo oye eya okuvena po epapa lomushangidingi pamwe nomufindani vali mukwao. 

“Otwa li ongudu yovashangi veefilima onduba ashike hewa onde shi pondola okufindana. Kino okwa yandja ashike omapapa kovashangidingi vavali ovo va vena keshe umwe oN$50 000,” Ekandjo ta ti. 

Oshimaliwa osho ovafindani va vena, ohashi longifwa okufaneka eefilima davo meedolopa omo ve li. Ekandjo okwa ti vo ova hoolola Outapi shaashi ovakufimbinga vavo vahapu ohava di mOutapi. 

Ekandjo okwa indila ovakwashiwana modoolopa yOutapi opo ve va waimine mekufombinga lofilima yavo. Okwa ti otava ka pumbwa ovakufimbinga va wedwa po osho yo ovo tava ka kala mengungo lovanhu. 

-awakudumo@nepc.com.na