Auleria Wakudumo 

Ehangano lokuandjaneka olusheno monooli loNored ola kunghilila oshiwana moshitukulwa shaHangwena osho yo Okavango East opo shi xulife po okuhanauna oukefa volusheno nokuvaka po eengodi dolusheno. 

Omupopiliko waNored Simon Lukas okwa holola kutya ehangano ola didilika oiningwanima ivali italala yehanaunepo lomaliko olusheno moshitukulwa shaHangwena. 

“Oshiningwanima shimwe osha ningilwa molukanda Ekolola modoolopa yEenhana oshoyo shikwao osho sha ningilwa momukunda Neyuva popepi nongeleka Shighuru Roman Catholic Church moshitukulwa shaKavango East,” Lukas ta holola ngaho. 

Nored okwa holola kutya oilonga youlunga oshoyo okuhanaunapo eengodi naikwao yolusheno otai shunifa monima exumokomesho neadjaneko lolusheno moshiwana. 

Lukas okwa ti yo oilonga ya tya ngaha oya nyika oshiponga. Okwa ti okuhanaunapo oukefa, eengodi naikwao yolusheno inai nyika ashike oshiponga kwaao teshi ningi ndele otashi dulu yo okutula oshiwana ashishe moshiponga. 

“Otashi dulu shi ete efyo, okumona oshiponga, omundilo ile shi ete olusheno li weko,” ta weda po ngaho. 

Nored okwa holola ta ti ota ningile oiningwanima oiningwanima ei ivali omakonakono opo ovo vena moo nyala moiningwanima ei va tulwe moipandeko. 

Oshiwana otashi indilwa opo shi li kaleke kokule nokuxulifapo ehanauno noulunga womaliko aNored oo eli momidingonoko davo. 

Ovakwashiwana otava indilwa yo va lopote kopolifi meendelelo keshe ou ta kendabala okuvaka ile okuhanauna eengodi ile oukefa volusheno momidingonoko davo. 

Nored okwa indila yo oshiwana shi kotokele eengudi dolusheno ile eengodi odo da wapo molwa odula ile omhepo momidingonoko davo unene pefimbo lomidimbi. 

Eengodi oda nyika oshiponga notadi dulu okutwaalela eemwenyo dovanhu. 

Ovanhu ova indilwa va ha kume ile okuenda popepi nado ndele nava lopote oshinima sha tya ngaho kovanambelewa vaNored popepi navo. 

-awakudumo@nepc.com.na