Auleria Wakudumo

Omukulunhu wopolifi moshitukulwa shaShana, Commissioner Naftal Lungameni Sakaria okwa koleka kutya ovanadolongo vanhe vomovanadolongo vatanho ovo va li ve livaka mokakuma ova monika. 

“Umwe womovanadolongo ava oye ashike e liwe natango mokashoko nopolifi otai twikile okukwashilipaleka kutya aveshe ova shuna modolongo,” Sakaria ta holola ngaho. 

Otaku hokololwa ovanadolongo ava va li vamwe vomeenghwatwe nhano odo vati de livaka modolongo yaNgwediva konima eshi vati va teta oipeleki yonduda omo hava nangala. Ovo va shunwa modolongo ovo Angula Shindinge nedina la shivika nawa Mapadi nokwa li a tulwa moipandeko molweteyo leumbo, Bravo Erasmus molwoshibofa shehepeko lomomumbo, Bishop Hangula a tulwa moipandeko molwoshibofa shekwatonghonga osho yo Gwiilundo Shimanya molwoshibofa sheteyo leumbo nekendabalo ledipayo. 

Oo ina monika natango oye Martin Kabila Pohamba. Pohamba okwa li moipandeko molwoshibofa shekwatonhonga. 

MuApilili neudo opolifi oya lopota ovanadolongo ve livaka modolongo yaNgoma moshitukulwa shaZambezi, konima eshi vati va dula omupolifi eenghono oo a li ta patulula eesela davo. Movanadolongo ava vati omwa li ovakwashiwana vaZambia ve li vatatu ovo va kwatwa, nOvanamibia vavali ovo ve liwe molukongo natango. Natango muJuni neudo omwa lopotwa ovanadolongo ve li 11, ovo ve li pokati keedula 14 no 17, ve li vaka modolongo yaLuno, moshitukulwa shaShana konima eshi vati va teta oipeleki yeesela davo. Ovanadolongo ava vati ova kwatelwa mOshikoto, Ohangwena nOshana. 

Ovanadolongo ava ova patululiwa oibofa yefadukepo, noi na okuwedwa koibofa yavo ei tava pangulilwa. 

-awakudumo@nepc.com.na