Auleria Wakudumo
Ovanafaalama vehe shivike ove likufila oveta eshi va patulula omunino womeva oo hau yandje omeva kodoolopa yaKhorixas nokeefaalama domomudingonoko.
Omupopiliko wodoolopa yaKhorixas Simson Ochurub okwa holola ta ti ovanafalama va patulula omunino womeva, popepi neefaalama mbali di li konyala eekilometa 40 okuya moKhorixas.
NamWater vati oku na eemboola mbali keshe pofaalama odo hadi pombo omeva fiyo omodoolopa yaKhorixas tava longifa omunino oo wa patululwa kovanafaalama.
Ovanafaalama vahapu, mwa kwatelwa ava taku fekelwa va patulula omeva vati ove ya okukala ponhele neefaalama odo molwoimuna yavo nande ponhele ove li po shihe li pamulandu.
“Ovanafaalama ova patulula apa omunino wa shakena okuya keenhele da yooloka. Katu shi kutya ova patulula nashike natango,” Ochurub ta ti.
Ochurub okwa weda po ta ti eshi otashi dulu okutula odoolopa momhumbwe yomeva shaashi ngeenge omeva otaa ningi mashona motenga.
“Ngeenge okwa shuna pedu motenga, nena ohatu ke li hanga eshi oitopolwa imwe modoolopa tai kala kai na omeva ile omeva taa pate,” Ochurub ta ti.
Ochurub okwa ti ngeenge omaumbo amwe a kala ehe na omeva, unene ovakwashiwana ohava yandje ombedi kuNamWater nonande epuko olovakwashiwana.
Ochurub okwa ti ova kwatafana nakomufala wopolifi moshitukulwa shaKunene Commissioner James Nderura va tule oukuni kumwe opo va xulife po ehanauno lomaliko oshiwana.
Omupopiliko waNamWater Lot Ndamanomhata okwa holola ta ti NamWater ita dulu okutya sha koshinima osho shaashi opo ve shi shiivifilwa ashike otava ningi omapekapeko nokuninga omakwatafano novanambelewa aveshe opo va yandje olopota yomondjila.