OMUTHIYA- Nguuru gwaOshikoto Penda Ya Ndakolo kahundilire vakansela momukunda gwendi asi vahepa kuruganena kumwe ntani nonkarapamwe nonompitisili dopampo yipo vatungimo momukunda vagwanenemo mauwa gavatumbukira.
Age kahuyungire posilika esi kasikereko sokutungika kansela ogu kavahorowere sinkwa ntani gomukunda gwaGuinas Moses Khumub modoropa zaOmuthiya nkera. Age katente asi vakansela ndi nompitisili twahepa kurugana moomu twavhulira yipo vantu womomukunda vagwanenemo mauwa. yaNdakolo katambwire Khumub omu kafundire mahoroworo gokukwateramo kagakereko mo 17 Murongagona 2025.
Age kahundilire asi gahepa kukwama moomu ngarugana Elias Marthinus, kansela gwanare gomukunda Guinas.
Marthinu kwadogoroka mwaSiwogedi mvhura zina puko. Khumub katente asi ukansela wendi una tameke ngesi.
Age kuna kukagwanekera kumwe nonkarapamwe akatare asi ngapi omu navagusapo maudigu gawo. Ame kuna kuza nikazuvhe kovantu vene, asi yinke maudigu gawo nitare asi ngapi mokuvhura kugagusapo,’’ yimo ana kutanta.
Age simpe kagwedereko asi age nakalimburura kwayimwe eyi vatumbwire posiruwo sokukondjera evango eli ana gwana. ‘’ Guinas mukunda gomunene, omu mwakara nomukunda gona dononzi kwakara hena nomaudigu gavene.
Khumub kagumine asi udigu wepiro yirugana kuna kara nye udigu wounen yahepa nye kukara sokuhova kutara asi kurugana ngapi.
“Ose twahepa kupapara vapunguli vawize vayapungure moGuinas, tuyagusepo epiro yirugana. Nampili ngoso ose kwakara pevango lyewa nevhu lyewa, eli natuvhura kuruganesa yipo vantu vetu vakwanenemo mauwa; yimo ana kutanta.
Mokugwedako, Matheus Kamati, kansela gwaOnayena moOshikoto, kavamutumbwire asi takara nye silyo sokomitiye zegendeso. –Nampa