KATIMA MULILO – Muuna walilimo zemashumi amalalu kazesupile ili mupokola yabelekela kwa khuta ya muatuli yomunyinyani ya Katima Mulilo, Eric Simataa, nahanezwi kulifa masheleñi akulibelela muzeko wahae kwande hane abonahalile mwa khuta ya sikiliti Labune, fapila muatuli mwa khuta yenyinyani Laina Nambonga.

Simataa utalimana ni milatu yemibeli ili buputeleli ni bulyangelino bwa kubelekisa ofesi yahae kapa situlo sahae kuli afumane sesiñwi. Taba ne isizwe la 19 Yowa kuli ato kupa kulibelela muzeko wahae kwande. Naize uka kupa muyemeli wamubuso. Kanako yabonahala mwakhuta muzekisi wamubuso Brunah Mukoya nakile atalusa kuli taba yatalimana niyona Simataa ibukiti mi sicaba sitalimezi, nikuli haiba inge alumelelwa kuzekela taba yahae kwande akaswana atukufaza lipaki za mubuso. 

Mwa maikuto ahae Mukoya nabata kuli taba iswe la 16 Lungu. Neli kayona nako yeo Simataa haikupela kuli bakeñisa kuli kimubeleki yasebeza mwa mubuso, hakanga mazazi amashumi amalalu asa bonahali kwamusebezi akaswana azwisiwa musebezi. Kakuli mulao ubulela kuli mutu asanga feela mazazi amashumi amalalu atatamani asiyo kwa musebezi una nikuzusiwa musebezi. Neli kalibaka leo muatuli nalumezi kuli akute mwa khuta Labune viki ye, kuli ayo kupa kuzekela kwande simubuso.

Milatu yatalimana ni yona Simataa ikulubelwa kuli ne ezahezi mwahala 9 Ñulule 2025, ni 10 Yowa 2026, kanako yene isika patalalzwa mwa Katima Mulilo, mwasikiliti sa Zambezi. Piho ya sipokola ibulela kuli Simataa nasweli kutukufaza ni kusabisa mubilaeli kuli haiba asa mulifi masheleñi mwana hae “uka bolela mwatolongo.”

Zeo kaufela litaha kasamulaho mwana mubilaeli walibizo la Masule Sitali nakile atamiwa ni mulikana ‘hae la 1 Ñulule 2025, kasamulaho akushapa Simataa kapafa. Lipaki libulela kuli Simataa ni mulikana hae nebakile banata Masule ni mulikana hae, kalikakalezo zakuli nebana ni matokwani. Kukulubelwa hape kuli Masule ni mulikana ‘hae hane babata kukwalulela Simataa muzeko litaba nelisa zamayi hande. Kabaka la bunyemi kihabataha ni mulelo wakuyobandamena Simataa nikumushapa kalipafa. 

Nebakile batamiwa bubeli bwabona, Simataa amano bakwalulela muzeko wakumunata. Kukulubelwa kuli hane bali mwatolongo Simataa akala kutukufaza ndatahe Masule, mi amutomela kuli amulife N$5 000 kuli mwana hae alukuluwe ni mulikana ‘hae balukuluwe. Kanako yesazibwi ndatahe Masule nakile afa Simataa N$2000. Kasamulaho aliviki zetalu Masule ni mulikana’ hae nebakile balumelelwa kuzekela taba yabona kwande kakulifa N$500 muñwi ni muñwi. 

Simataa azwelapili kutukufaza ndatahe Masule kuli amulife masheleñi. Ndatahe Masule kasamulaho akubona kuli watukufazwa kiha ya kuyo biha Simataa kwa mapokola. Mapokola kiha ba mufa masheleñi alikana N$1000 ili akauhanyizwe kuba ma N$100 alishumi. Alumelelana ni Simataa kuli bakatane ayomufa masheleñi ao, neli kanako yeo mapokola bayo mulambela mwa kezo anze ‘amuhela masheleñi ao. Kiha ba mutama nikumulenga mwasitokisi.