Omukainhu womido 45 okwa tetaulwa nomakatana komulumenhu  waye womido 51 keengulasha dEtivali lwopotundi 01h20 molukanda Sky mOngwediva.

Omukainhu okwa tambulilwa moshipangelo shaShakati ta mono epango eli monghalo ii.

Opolifi oya ti konima yoshiningwanima omulumenhu okwe li mangeleka nongodi monduda yavo yokunangala.

Omupopiliko wopolifi moshitukulwa shaShana Inspector Thomas Aiyambo okwa hokolola ta ti omulumenhu nomukainhu ova ninga omafiku tava tanguna meumbo eshi vati omulumenhu ta fekele kutya omukainhu waye okuli mekwatafano lopaihole nomulumenhu umwe.

Okwa ti okupendukila onghela, omulumenhu okwa kufa ekatana ndele tateula omukainhu waye komutwe, moshipala nokeenyala.

Okwa ti ounona ova hokolola kutya ova uda ovakulunhu vavo tava tanguna omanga oshiningwanima eshi inashi ningw. 

Ovakwapata vavo ova shiivifilwa kombinga yefyo lomulumenhu, nomakonakono opolifi otaa twikile.

Moshitukulwa shaHardap omwa lopotwa efyo lomulumenhu a fya eshi a tuwa nombele yokapi kokaume kaye eshi kwali tava tanguna poundingosho efimbo lokomatango Olomakaya moRehoboth.

Nakufya okwa tongolwa oye Simeon Books womido 28.

Omupopiliko wopolifi moshitukulwa shaHardap Inspector Linea Heita okwa hokolola ta ti konima eshi   omulumenhu a tuwa nombele momunino okwa twalwa koshipangelo shaRehoboth nokonima okwa ka tuminwa koshipangelo shakula shaWindhoek, ashike okwa xulifila mondjila, koWindhoek ina fika ko.

Opolifi oya ti kutya omufekelwa okwa faduka po konima yoshiningwanima, onghee opolifi oyeli pyakidila nokumukonga.

Opolifi otai indile moshiwana kukeshe ou e na ouyelele kombinga yomufekelwa ou opo lopotele opolifi keshe ili popepi.

Omakonakono opolifi ota twikile moimbofa yomadipawo aishe ivali. – fhamalwa@nepc.com.na