Paulina Ndalikokule

Okakomisi kaanambelewa yepangelo moSADC oka toto omutumba gwokukundathana nokupaathana omayele shi na sha nokugandja nomayakulo koshigwana papangelo miilongo yayo. 

Okakomisi haka oka li ka totwa komutumba ngoka gwa ningwa oshiwike sha zi ko moSouth Africa.

Omushangwa gwa tumwa kiikundaneki ogwa ti okakomisi hoka oka totwa opo ku hwahwamekwe elongelokumwe lyiilongo ya-SADC.

“Okakomisi hoka otaka kala nokweeta pamwe aanambelewa ya longathane yo taya paathana uunongo. Omutumba nguno omwaanawa oshoka otagu koleke omayakulo moombelewa dhoshigwana okupitila momalunduluko taga etwa kokomisi,” a ti.

Okwa ti otaka ka yamukula woo komaupyakadhi ngoka aanambelewa ya taalela opo ya vule okulonga iilonga yawo pauyuuki molwuuwanawa wiigwana yawo. 

Somadoda Fikeni sho a tambula ko aayenda moSouth Africa okwa ti omutumba otagu kala noku onga nuushili nonelongelokumwe.

“Oonkondo dhelongelokumwe otadhi tu kwatha tu simanekathane nonando otwa za kiitopolwa ya yooloka opo tu gandje omayakulo omawanawa,” Fikeni ta ti.

Moshigongi oya kundathana opo ya kale taya dhimbulukwa esiku lyokugandja omayakulo muAfrika, nokulongela kumwe noombelewa dha yooloka.

Aanambelewa okuza mo-SADC, ya za kiilongo ngaashi Kingdom of Eswatini, Lesotho, Mauritius, Namibia, Seychelles, Tanzania naSouth Africa oya wayimine oshigongi shoka.

Oya talele po wo omitumba dhilwe nomahangano ngoka haga hwahwameke uundemokoli moshilongo shoka.

-ndalikokulep@gmail.com