Nē kurib 1 !Hoaǂkhaib disa xub ge ǂhanuba !aruǀî Namibiab !hūǂnûǁkhaebadi sîsenaon ǀgôana ǁgau!nâs !aroma hâ huiba māsa nî ǀamǀam.
Nēsis kōseb ge ǂhanuba 85% kōse hâ marisa ǁnā ǀgôan skolgu !aroma gere mātare ǁnāpan ǁgûna 15% ǀguiga gere mātrese.
Erica Shafudahs, ministeris mariǁhōn dis tawa a sîsenǂuira direkters ge ǁnāti ī ǂanǂans nē ǀkharaǀkharasib dis hîa 18 Hôasoreb 2020 di datomsa ūhâs, New Erab xa ge mûhesa, hoa !kharaga !hūǂnûkhaebadi Namibiab ra ǂnûǁkhae!nâbahedi di !hūga !oa ge sîǂui. Nē ǂanǂans ge 1 !Hoaǂkhaib disa xu a sîsenxa.
“ǁNā-amaga du ge ra hōhō!nâhe, ǀasa marikurib di ǀaweǁguisa ǂnûiǂuide du ra dī ǁaeb ai, hoa marin hîa ǀgôan ǁkhāǁkhāsendi ǂnamipe nî hâna nēpa xu ǀariǂuisa.
Nēs ge nau mîdi !nâ ra ǂâibasen, ǂhanub goro mā huib ra ǁnābēsa 1 !Hoaǂkhaib 2021 disa xu.
Nē ǂanǂans ge a ǀuniga mîǁgui,” tis ge Shafudahs sîǂkhanisa ge ǀam.
“Covid-19 di khoraǂuisens tsî ǁîs ūhâ !gâi tama sîsenǂuib, ǂâi!nâǁguisa ǂgâxa nî ǀhae maris ais ge, ra !aroma ǀgaisa ǁkhoaxa tama mîǁguigu ǀnî marimāǂuidi ǂnamipe nî ūhesa,” tis ge Shafudahsa gere ǁgui!ā.
Ai!âs ge Shafudahsa hoa Namibiab !Hūǂnûǁkhaeba-aona xu ge ǂgan, in mariǁhōn ministerisa ǁnā 15%gu !âb, ǁgûn nî mātarese ge ī igu di ǁgauǁgaudi hîa koro kuriga !khōǂgā hâna ǁgui-ai!â.
“Hanan sadu ǁaegu khoena nî hâ nē 15%gu !âb marisa ge mātare tama hâ ina, ots ge ra ǀawemāhe, !Hūb Mariǁhōn 31ǁî ǂHanumās 1991ǁî kurib disa sîsenxa kai tsî surudets hâ marisa 1 !Hoaǂkhaib 2021 dis ai mātaresa,” tis ge Shafudahsa ge mî.
Ai!âs ge Shafudahsa danan !hūǂnûǁkhaebadi dina ge ǂgan, in !gâi ǁnâuguba hâ!khaina ǀkhuwis ǂnamipe sîsentsoatsoa kai ǀasa ǁnâuguxoaǁguigan nî tsoatsoa-ūs ai!â, Covid-19 ūhâ !gâi tama sîsenǂuiba ǂâis !nâ ūhâse.
Shafudahs ge ai!â ge ǂgan, îs ministerisa hoa mātaredi hîa ǂhanub xa !auga!hūsi ǂ!hūǂnûkhaebadi sîsenaon hâ!khain !aroma ra mātarehen ǁgauǁgaude sîba.