Ounimiteli wouyelele nomakwatafano otau xwaxwameka ovakalimo vomoshitukulwa shaHangwena eshi va ninga oshikonga shokuyandja ouyelele nehongo kombinga yefimano lovenda yoCovid-19 Etitatu kOshikunde.
Elalakano loshikonga okukondjifa etandavelO lombuto yoCovid-19 nokuyandja euyelele koshiwana opo shiye momwaalu munene opo shi kale sha katunhilwe ombuto.
Ouministeli wouyelele nomakwatafano otau longele kumwe nouministeli wouhaku opo u kale wa ninga oikonga moikandjohoololo ya yooloka yomoHangwena. Ovanailonga vouhaku otava kala tava yandje etunhilo loCovid-19 pefimbo loikonga tai ningwa momikunda opo ovanhu ava vena oupyakadi wokuya koupangelo va kale vatunhilwa mefiku loshikonga. Pefimbo loshikonga shali kOshikunde ngoloneya waHangwena Walde Ndevashiya okwa twa oshiwana omukumo opo shi kale tashi topolafana ouyelele kombinga yefimano lovenda yoCovid-19 opo ovanhu aveshe va kale vena eundeko la wana. Ndevashiya okwa ti ei oyo omhito iwa koshiwana opo shi kale shatunhilwa pefimbo loshikonga eshi nokukala yoo vali va pula ovanailonga vouhaku omapulo eli kombinga yovenda yoCovid-19 ngeenge otashi kwafele tuu shili omunhu konima ngeenge a vendwa.
“Ovanhu naxa xulife po okutandaveleka ouyelele woipupulu uli kombinga yovenda yoCovid-19 shaashi eshi itashi kufa ovanhu ohokwe yokukala va katunhilwa,” Ndevashiya ta ti.
Efiku tuu olo loshikonga ovanhu vahapu va dja mokikunda da yooloka ovatunhilwa ovenda yavo yotete omanga vamwe ovatunhilwa ovenda yavo yaxuninwa.
Oshiwana okwa li sha holoka momwaalu munene mendodo da yooloka mwakwatelwa ounona novakulupe veu ya okukufa ombinga moshikonga shetunhilo. Umwe womovakwatelikomesho moshikonga eshi, kansela woshikandjohoololo shaKongo Efraim Shipindo okwa kunghulila oshiwana opo shi kale tashi mane ko eevenda da sho adishe shaashi ohashi kwafele ngeenge omunhu a mana ko eevenda daye detunhilo loCovid-19.
Shipindo okwa ti ovanyasha ina va kala vali tava lombwele ovakulunhu oikupupulu kutya ngeenge vati omunhu a vendwa ota dulu okukwatwa kombuto natango. Okwa ti oveene vomikunda nava kale tava xwaxwameke ovanhu momikunda opo vaye ketunhilo shaashi eshi otashi kwafele okushunifa etandavelo lombuto pedu moshilongo.
“Ngeenge omunhu a tunhilwa oha kala ena omhito ili pedu yokukwatwa kombuto yoCovid-19 onghee osha fimana ngeenge a tusheni ohatu kala twa tunhilwa,” Shipindo ta ti.