Ngoloneya woshitukulwa shaMusati Erginus Endjala okwa ti eenhauki dovaAngola edi dili pEtunda ita diwana po vali ponhele a pa hadidi shaashi omwaalu wado owa londa.

Okwa ti paife eenhauki dimwe odeli hanena pEtunda omanga dimwe ohadidi polukanda lili pOshifo shaashi kape na vali onhele ya wana.

Endjala okwa hokoholela Kundana ta ti eshi oshili eshongo linene shaashu noikulya kai po vali ya henene ovakainhu, ovalumenhu nounona vavo ovo ve uya oku hondama ondjala moNamibia. 

Okwa ti ngeenge oweya Petunda oto hange ashike tava elaela, tava kongo oikulya. “Efiku keshe moshitukulwa shaMusati ohamu holoka omwaalu muhapu weenhauki tadidi koAngola tadi kongo a pa pena dikwao,” Endjala ta ti. Okwa ti ombelewa yaye oyeli pyakidila nokukonga onhele ya kula apa ta padulu okutula eenhauki opo di kale dili ponhele yaandjuka nawa. Ngoloneya okwa kunghulila oshiwana opo shi likaleke kokule nokuningila eenhauki ominyonena ngeenge tadi ende pomaumbo avo tadi kongo oikulya. “Ombelewa yange oya shiivila ombelewa youkalelipo shilongo yaAngola kombinga yomukundu ou wovaAngola itava wana vali ponhele imwe ei kwali vatulwa tete,” Endjala ta ti.

Okwa ti ombelewa youkalelipo shilongo yaAngola oya nyamukula kutya otai keu ya pEtunda opo i kale ya shanga omadina Ovaangola aveshe veli mOmusati, yo idule okuninga omalongekido nghee ina okukala ya kwafa eenhauki. Ngoloeneya okwa ti eenhauki oda ninga oihakanwa yomikifi da yooloka ngaashi eenhauki dimwe oda kwatwa komukifi wonghana wa etwa kondjala nokekako omanga oomeme vamwe ova ninga oipute komavele. “Natango onghee nga handi indile moshiwana opo shi yambidide eenhauki noikulya, oidjalomwa noikumbafa shaashi ota di dengwa unene konghai nondjala,” Endjala ta ti.

Okwa ti kukeshe ou ena ehalo lokuyambidida eenhauki nakwatafane lombelewa yaye ile a kwatafane nombelewa yakansela waRuacana.

Okwa didilikwa eenhauki dovAngola da mbolokotela moNamibia ketameko lomudo ou eshi da tauka oshikukuta eshi shili pushiindalongo Angola. – fhamalwa@nepc.com.na