Festus Hamalwa
Endiki lokutonatela ounona ve na oulema loDr. Frans Indongo Special Care Centre otali pula ekwafo moshiwana opo shi yambidide endiki lavo noinima ngaashi oikumbafa, oikulya, ominambo dounona, outemba, oikutu nosho tuu oipumbiwa ikwao.
Pendiki opo opena ounona 25 aveshe ve na omaulema a yooloka, vo opo hava nangala pendiki opo veli mefiloshisho lovanhu.
Endiki eli ohali tonatele ounona oshali ve na oulema. Pendiki opo ope na ounona vamwe vanini nounona va kula veli peedula 14 na vo ve na oulema.
Ounona vamwe ihava dulu okupopya omanga ounona vamwe oha pewa ikulya komilungu shaashi ove na oulema keenyala.
Pefimbo Kundana a talela po endiki eli lili poKandjengedhi mOshakati, Aili Shilongo omukulunhu wendiki okwa ta ti okwa tota po endiki nelalakano okukala ta tonatele ounona aveshe ve na oulema ava inava ha lika vali kovadali vavo.
Okwa ti ounona veli pendiki vamwe ova etwa po kovadali vavo, ovo paife va kala po efimbo lile.
Shilongo okwa ti ovadali vamwe ihava talele po vali endiki apa pe na ounona vavo, omanga vamwe ohave u ya ngaa okutalela po ounona vavo.
“Ame ondi hole ounona naashi osha pange omadilaadilo opo ndi kale handi tonatele ounona ve na oulema peumbo lange. Ina ndi hala okuuda okaana ke na oulema ka kupulwasha ile ka ningilwa omunyonena shaashi ovanhu ve na oulema navo ovanhu ashike ngaashi ovanhu aveshe,” Shilongo ta ti.
Okwa ta ti otai indile moshiwana opo shi u ye okuyambidida endiki lounona vena oulema shaashi ounona ova pumbwa oikwafifo ihapu ya yooloka.
“Ounona vamwe ohava li ashike okatete nomashini shaashi omandjandja avo inaa kola nokulya oikulya oikuku, naashi ohashi tu pula opo tu kale ha tulongifa oshimaliwa shihapu,” Shilongo ta ti.
Shilongo okwa ti pendiki opo okuli po novanyasha vatatu ovo hava kala tave mu kwafela okuyandje etonatelo kounona shaashi ounona paife ova ninga vahapu, vali yee ita dulu okukala tava tonatele ounona oyeke.
“Ounona ohava pewa etundi dofikola ngaashi okuninga oinyangadalwa yofikikola okulihonga omaludi eendada nokuvalula. Ohatu longo nondjungu opo tu kale twa longa ounona va kale veshi okulesha nokushanga,” Shilongo ta ti.