Omupopiliko wopolifi moshitukulwa shaHardap Inspector Linea Heita okwa hokolola ta ti oshiwana modoolopa yaMarientela osha ninga oihakanwa yookalyamupombo ovo tava teya omeumbo vehe na olufuo.
Okwa ti oumbudi wokuteya omaumbo owa londa unene pombada modoolopa yaMariental novanhu vahapu ohava i koitaashi yopolifi tava nyenyeta omaumbo avo a teywa.
Heita okwa ti omaumbo mahapu oha teywa efimbo loufiku ngeenge oveene vomaumbo va dja po vaya kondje yodoolopa, omanga amwe oha tewa efimbo lomutenya ngeenge oveene vomaumbo vaya koilonga.
Pefimbo Heita a ninga eenghundafana naKundana okwa ti unene tuu peifmbo loutalala olo limwe ladidilikwa ovanhu hava kala vangudumana koitaashi yopolifi eshi tava patulula oimbofa.
Heita okwa ti ovanhu ohava kanifa omaliko avo a yooloka ngaashi oipundi, eembete, eeTV, oimaliwa, oikutu noshotu oinima ihapu hai kala meumbo. Okwa ti konima ngeenge omaumbo a teywa luhapu ovalunga ava ihava kwatwa kopolifi shaashi oohava i kondje yodoolopa opo ka hondame.
“Opolifi oya didilika ovanhu vamwe ve hole okutula komalungula ngeenge tava i kondje yodoolopa hava kala va shanga kutya ovaya peni nefiku omunhu ta ka luka, naashi ohashi yandje ouyelele kovashiinda ile koolyamupombo opo va kale va ninga eenghendambala nokukateya eumbo,” Heita ta ti.
Onghee okwa kunghulila oshiwana opo shixulife po okukala tashi tula ouyelele komalungula ngeenge tashi di po.
Okwa ti ovanhu nava kale tava fiye ovanhu vokukelela momaumbo avo shaashi eshi otashi kelele omaumbo a tewe ngeenge muna omunhu a kelela mo.
Okwa kunghulila oshiwana opo shi kale shina ekwatafano liwa novashiinda shavo opo ovanhu va kale tava lekelafana ngeenge tava i kokule.
“Unene tuu pefimbo lomatango manene ookalyamupombo ohava kala tava kongo ouxupilo. Onghee ohandi kunghilile ovanhu opo va kale tava fiye omaumbo vavo ena omunhu a kalela mo nokukwashipaleka kutya omivelo domaumbo odina omakumba a kola,” Heita ta ti. Okwa weda po ta ti oshiwana na shi longele kumwe opo shi kondjife oulunga wokuteya omaumbo modoolopa yaMariental.