Simon Shikongo ota pula ekwafo moshiwana opo shi yambidide eumbo laye eshi la pya po alishe mexuliloshivike komukunda Otamanzi, moshitukulwa shaMusati.

Meumbo omwa pila omaliko avo ayeshe ngaashi eenduda, oikutu noikulya nosho tuu oinima ikwao yali meumbo. Shikongo okwa hokololela Kundana ta ti eumbo ola xwikwa po kokaana keedula hetatu eshi kwali taka kendambala okuteleka oshiumbululwa, eshi kadja kofikola keu dite ondjala.

Okwa ti eshi okaana ka dja kofikola meumbo ina ka hanga mo ovakulunhu, onghee pefimbo eshi kwali okaana ka tema omundilo okwa li kuna omhepo unene naashi osha ka eta opo omundilo uli yanene keenduda domeumbo. Konima eshi omundilo wa haka keenduda okaana oka lotokela poushiinda opo keke va lombwele, nokonima eshi ovashiinda ve u ya ova hanga nale eenduda adishe domeumbo datema omundilo.

Shikongo okwa hokolola ta ti ovashiinda ina ve shipondola vali okudima omundilo shaashi ka kwali pena oikwafifo yokundimifa omundilo.

Okwa ti moshiponga eshi shomundilo ina mu kanifilwa omwenyo womunhu ile omunhu a mona oshiponga. “Ohandi indile moshiwana opo shi yambidide eumbo lange noikulya, oikutu, noikumbafa nosho tuu oipumbiwa ikwao yomeumbo shaashi paife otwa fiwa pomutenya komundilo pamwe novaneumbo vange,” Shikongo ta ti. Okwa ti paife ohava nangala meetanda edi va pewa kovashiinda, vo omo hava tu vikile noikulya yavo paife.

Shikongo okwa ti pefimbo eumbo kwali tali pi omukulukadi waye okwa hangika eli mondjila auka keenghali dili pomukunda vavo, omanga yee okwa hangika eli koushimba. Okwa ti ova shiivifila ombelewa yakansela yomoshitukulwa, ashike kansela okwe va udanekela kutya oteu ya eva talela po nale.

Okwa ti kukeshe ou ena ehalo lokuvayambidida nakwatafene naye konomola yongodi 0812346138 ile oshiwana shikwatafane nombelewa yakansela.

– fhamalwa@nepc.com.na