!GOMENǁGAMS – !Gomenǁgams di !ā!khōmais ge N$173 miljuns ǁîs mariǂnûiǂuis disa !hū!âde aiǂhomis projekdi !aroma ǂnûiǂui hâ.!Ā!khōmais di ǂgaeǂguis komites di aiǂnû-aob, Richard !Hoaeb ge nē mariǂnûiǂuisa ge aoǁgui. ǁÎb ge mîs ge, !hū!âdeaiǂhomi tsî ǂgaoǀkhāsa !gao!gao xūna nî sī-ūse īs di projekdi ǀguis xa a !nāsa marikuriga ra !khōǂgāsa. !Hoaeb ge N$887 miljunmaris di ǁkhāsiba !khōǂgā hâ ǂnûiǂuis hîa ǀguis xa a !nāsa marikurigu !nâ nî dīhesa, kai maride nî !khōǂgā projekdi !aroma komitesa ge ǁgui-ai!â. Nē kurib !aromas ge N$461 miljunsa nē ǂnûiǂuisa marisa xu nî sîsenūhe tsî !gau ra N$426 miljunsa sao ra marikurib tsî ǁnās khao!gâ. Nē marikurib di N$461 miljunsab ge !Hoaeba sao rase ge ǀgora!ā hâ i; N$55 miljuns xa a !nāsa maris ge Farm 37 di !nona !âgu hîa 727 !hū!âde nî ǂoaxasa nî īǁkhā kaise, ǁîde xu di 677 !hū!âde ǁan!khain !aroma nî hâse. N$48 miljuns ge Narraville ǁanǁguib di 8ǁî Khoraǂuis hîa 225 !hū!âde nî !khōǂgās !aroma hâ. Nē !hū!âde xu di ge 194de ǁanais !aroma a ǂâibasensa. “N$10 miljuns ge Meersig ǁanǁguib di 3ǁî Khoraǂuis hîa 96 !hū!âde nî !khōǂgā tsî ǁîde xu 86 ǁanais !aroma nî hâse a ǂnûiǂuibasa,” tib ge !Hoaeba gere ǁgui!ā. !Aruǀîs ge N$42 miljunsa ǂhâbasa !oabade mās projekdi !aroma a ǂnûiǂuisa, !gōsase ǁgam-i ǀkha a dīxūxa !âga. “Daoga !gâi!nâ tsî !khō!khunis !aromas ge N$104 miljunsa a ǂnûiǂuisa,” tib ge ge mî. Ai!âs ge N$35 miljunsa ǀhûhâsi !oabadi !aroma a ǂnûiǂuisa hîa Ekutus, Naravilles di ǀhowadiǂgāb, Build Together Proxrammi tsî ǁkhāti ǀaeǀaris !khaiba Farm 37 tawa kurus tsîna !khōǂgā hâsa. ǁKhātis ge !ā!khōmaisa autona dī-ūnus tsî ǀasan ǀkha !khō!khunis !aroma N$91.5 miljunsa ǂnûiǂui hâ. Nē !âb auton dib ge kaise a ǁgariǁgarisa ǁanǂgāsabena !oabade mās !aroma. !Nāsa !nādes ge ǀawemā!nans di sîsenga ra !hâumâihe, ǁaekoroben autona khôa tsî sîsengu di dīsa īǁkhā kai tama ra ī xui-ao.