Ovanhu 32 otava mono oixuna kondjala noluhepo eshi hava nangala petoto loimbodi lili kolukanda kOtjomuise moWindhoek.
Ovanhu ava ova dika outenda vavo vokunangala omanga vamwe ohava nangala koshi yomuti uli popepi nomulamba womeva.
Edi oda popiwa kuhamushanga wongudu yoPDM Manuel Ngaringombe oo a talela po ovanhu tava mono oixuna. Okwa hokolelela Kundana ta ti ovanhu oveli monghalo idjuu nai shaashi ohava dulu okuninga omafiku avali ina va lyasha.
Oshiwana eshi shokomihoko da yooloka ngaashi omuhoko wovayelele, Ovahimba nOvatjimba ova kala ponhele opo oule weemwedi mbali paife, va talela eshongo loikulya oidjalomwa noikumbafa nosho tuu oipumbiwa ikwao yomomaumbo.
Efiku olo Ngaringombe okwa yandja oikulya ngaashi oukutu woufila noshivelelwa koshiwana hashi di ponhele opo.
Okwa hokolola ta ti ombelewa yaye oya kala nokulopotelwa kombinga yonghalo ina ovanhu tava mono oixuna, naashi osha eta opo eu ye a talele po oshiwana eshi.
Okwa ti oshiwana shili ponhele opo omwa kwatelwa ounona 13 novakuluhu 19 ashike aveshe kavena sha oyuuyemo yopashimaliwa opo va dule okulilandela oikulya yomeumbo.
Okwa ti ounona va shona vamwe ova ninga omanyutu kondjala shaashi ooina kavena sha vali omashini okunyamifa ounona sha etwa eshi pe ena oikulya.
“Eshi da popya noshiwana osha hokolola tashi ti kutya osha pumbwa oikulya, oikutu, oikumbafa nonhele iwa apa tava kala tava di shaashi vati ova loloka okudja petoto loimbodi nopomulamba tau nyika nai,” Ngaringombe ta ti.
Okwa ti ombelewa yaye otai ka ninga omalongekido opo i kale ya yambidida oshiwana eshi tashi mono oixuna.
Okwa indila ouministeli woukashike kookanhu opo u kale wa talela po oshiwana eshi nokukala wa kandula po omukundu wondjala wa talelwa koshiwana eshi.