Taimi Haihambo

Ongwediva - Pefimbo lokuanifilwa moshilonga shouhongi mOshitukulwa shaShana umwe womwaavo va pita nova pewa eedjapo, Vaino Kambungu okwa li oye ta dana onghandangala eshi e shi endifa nawa nokuyandja okatapa kovanafikola vakwao.

Kambungu (23) oo a pita moshiputudilo shoHifikepunye Pohamba Campus okwa li a pewa omapapa aeshe atatu mwa katwelwa olo lokukala omulihongidingi moshiputudilo. 

Okwa li a popya nehafo ta ti okwa li e udite ehafo kuhe na vali molwaasho oshiputudilo sha tokola oku mu pa odjapo yaye i li pondodo oyo hai ifanwa first class, osho tashi ulike kutya okwa pita nosimbole ‘A’. 

Kambungu mokupopya ondjokonona yaye okwa ti okwa dile koshitukulwa shaMusati komukunda wedina Onandjila. Ta ti ova dalwa vavali kuina oo hanyangadala ashike nokulandifa oikunomwa yomepya lavo. Ta ti ina oha landifa ashike omahangu, noikunomwa imwepo yomepya, omanga xe a xulifa nale. 

“Onda kala alushe handi litu omukumo nokulipula kutya mbela ngeenge onda kala inandi longa ohandi ka kala peni? Onghalamwenyo yange otai fe peni?” Kambungu ta ti: “Ame onga ofiye ondi udite etumba paumwene, nokofamili yange okumona epapa eli lomunafikola dingi.” 

Ta ti keshe umwe oku na ehalo lokulihonga, nakeshe umwe okwa hala okuhuma komesho monghalamwenyo, mwa kwatelwa nounona ovo ve li keefikola dopedu.  Ta ti eshi otashi ningwa ashike ngeenge omunhu te lihongo nelitulomo nonelalakano. "Ou na okulonga noudiinini ngaashi lela tashi dulika opo u mone oshidjemo shoye sha xuuninwa shi li nawa," Kambungu ta ti.