Omahangano avali, loKahalari Holdings noFootstep for Africa okwa yambidida ofikola Oshamukweni Combined School oyo ya kala ina ounona tava mono oixuna molwa oku enda oinano ile moshikandjohoololo Okongo.
Ofikola ei oyali ya holoka moikundaneki omolwa ongha ii omo mu na ounona ovo tava mono oixuna, hava nangala pofikola meenhele dihe na oundjolowele omanga vamwe hava ende oinano ile shaashi komaumbo avo okokule.
Omahangano aa avali okwa yandja oshimaliwa ashishe kumwe shili peemilona N$3 oyo otai ka longifwa okutungilwa omuhandjo wofikola, okombifa yokutelekela. Kahalari Holdings okwa yandja omiliona N$1.5 noFootstep for Africa omiliona N$1.498. Omahangano aa avali okwa ti okwa mona onghalo yovanafikola eshi kwa li tai ndavelekwa komalungula ketameko lomudo ou, nghee ovanafikola veli monghalo idjuu. Naashi osha eta opo oKahalari Holdings noFootsteps for Africa a kale a ninga eenghendambala nokuyambidida ofikola Oshamukweni. Moshipopiwa shaye ngoloneya waHangwena Walde Ndevashiya okwa popya ta ti okwa opandula oKahalari Holdings noFootsteps for Africa eshi ya longa oshilonga ya fimana mokuyandja oshimaliwa kOshmaukweni opo i kale ya mona omohandjo wofikola. Ndevashiya okwa ti ovanafikola ova kala tava mono oixuna veli momhubwe yomuhandjo wofikola eshi va kala ashike hava nangala moubashu voipeleki veli moluumbo lofikola, omanga vamwe ova kala hava ende endjiladiledile tave u ya kofikola.
Okwa kungulila ovakalimo vopomudingonoko Oshalumbo opo va xulife po okukala tava lombwele ovatoolinghundana oipupulu kutya epangelo itali longosha shaashi eshi otashi yandje efano lii kepangelo.
“Ombelewa yange oya didilika omashongo a talelwa kovakalimo vomoshikandjohoololo shaKongo ngaashi omeva epate nomakwatafano Onghee oshiwana kaleni mwangungumana shaashi ondeli pyakidila nokuninga eengheendambala kombinga yomashongo mwa talela nonghee e na okukala a kandulwa po,” Ndevashiya ta ti.
Pefimbo ta tambula ko oshimaliwa eshi sha yandjwa komahangano avali omupeduwiliki wehongo moshitukulwa shaHangwena Palisha Ngulu okwa popya ta ti paife eshi oshi li oshikando oshitivali ehangano loFootsteps for Africa tali yambidida eefikola domoHangwena. Okwa ti omudo ou ehangano loFootstep for Africa ola yandja kwa li eekompiuta nongulumambo kofikola Nghiteke primary school.
Ngulu okwa kunghulila ovahongifikola opo vaxulife po okukala tava denga ovanafikola unene shaashi okudenga ota ku kufa omunafikola ohokwe yokukala teu ya keetundi.
Okwa ti ovadali na kale tava tu ounona vavo omukumo opo veli honge nelitulemo, nokukala yoo vali tava tale oinyangadalwa younona keumbo.
“Ovanafikola fimanekeni ovahongifikola veni, likalekeni kokule nokunwa omakaya nomaludu shaashi otashi piyaneke elihongo leni,” Ngulu ta ti.
Omukalelipo wehangano loKalahari Holdings Tuulikki Nanghelo Nelulu okwa popya ta ti ehangano lavo otali lalakanene okushakeneka epangelo ondjilakati tashi pitile mokuyambidida oshikondo shehongo moNamibia. Nelulu okwa ti tete ovatalela po ofikola Oshamukweni opo va ninge omapekapeko kombinga yonghalo yovanafikola, naashi osha ka eta opo va kale va yandja oshimaliwa shi longifwe okutunga omuhandjo wofikola nokombifa yokutelekela. Efiku tuu olo ehangano loFootsteps for Africa ola yandja oututa kovanafikola voukadona wokulikwafela ngeenge veli komafimbo opaushitwe.