Festus Hamalwa
Omukulunhuwiliki mouministeli wouhaku nonghalo nawa Ben Nangombe okwa ti Namibia okuli ponomola onhinatu mokukonakona ombuto yoCovid-19 menenedu laAfrica.
Nangomba okwa ti oministeli yavo oya longa noudinini opo i kale ye shipondola okukala ya ningila ovanhu vahapu omakonakono oCovid-19 okudja omudo wa djako pefimbo ombuto yatukuka moNamibia. Nangombe eid okwe dipopya Etivali eshi a ninga eenghundafana naKundana eshi a hokolola ta ti omwaalu wovanhu ve dule 7800 000 ova konakonwa ombuto. Okwa popya ta ti epangelo olina oshisho noshiwana nokukala lakwashipaleka kutya ovanhu ova amenwa kombuto yoCovid-19 nokomikifi dikwao da yooloka.
Okwa kungulila oshiwana opo shi kale tashi ka ningilwa omakonakono ngeenge she li hange shina omadidiliko ombuto shaashi osha fimana ngeenge omunhu a konakonwa ombuto opo kukelelwa etandavelo lombuto.
“Nonande omwaalu wovanhu tava kwatwa kombuto tau ende wau ka pedu, ouministeli wetu itau kanghama okuningila ovanhu omakonakono omukifi ou shashi ohatu lalakanene okukondjifa ombuto,” Nangombe ta ti. Nangombe okwa opopya ta ti moipangelo natango omuna ovanhu veli kepango lombuto yoCovid-19, omo ovanhu vamwe veli monghalo idjuu koICU.
“Omaandaxa moshilongo omwa lopotwa ovanhu 19 va monika ombuto yoCovid-19, omanga umwe okwa twala koICU eli monghalo idjuu shaashi ina tunhilwa. Oministeli yetu oya didilika kutya ovanhu veli koICU aveshe kapena ou a tunhilwa yoCovid-19 naashi osha eta opo ovanhu va kale veli monghalo ii,” Nangombe ta ti. Okwa ti omafyo nayo okwa shuna pedu moshilongo mokufafanifa nonghalo ikulu.
Nangombe okwa denga omufindo ta ti oministeli yavo onghee nga natango tai kunghulile oshiwana opo shi kale sha katunhilwa ombuto yoCovid-19 shaashi ngeenge omunhu a tunhilwa oha kale e na eameno la wana lokukwatwa kombuto.
“Ovanhu nava twikile okuliufa komilandu da tulwa po efimbo keshe opo etandavelo lombuto li kale la shuna pedu,” Nangombe ta ti.