Ngaashi naana okwa lopotwa kutya onhele yokupungula olwifo yeendjebo dopolifi koWindhoek oya kana eendjo dihapu, kakukutu komatanga wopolifi yaNamibia Lieutenant General Sebastian Ndeitunga okwa ti keshe opolifi e na ondjebo otai ka kala ya ningilwa omakonakono.
Ndeitunga okwa ti elalakano lokuningila eendjebo dili kovapolifi omakonakono nokukala da valulwa adishe opo ku tali ke ngeenge eendjebo odo vakwa monhele yokupungula odo dili kovapolifi.
Meenghundafana a ninga naKundana Omaandaxa Ndeitunga okwa hokolola ta ti eendjebo adishe doshikondo shopolifi oda longwa dina eenomola odo hadi tulwa mokompiuta ngeenge ta kuningwa omavalulilo.
Okwa ti eendjebo dili kovapolifi otadi ka ningilwa omakonakono opo ondjebo keshe ikale ya tali ka ngeenge oina onomola tai tu kumwe neenomola dedndjebo edi dava kwa koWindhoek.
Kakukutu okwa ti fiyo opapa kapena ouyelele kutya eendjebo oda vakwa po kulyelye, ashike ombelewa yaye otai ka ningila ovapolifi aveshe omapekapeko kombinga ngeenge ovo vena eendjebo odo.
“Otweli pyakidila nokuninga omakonakono omo oule shaashi otwa hala okumona kutya eendjebo oda ya peni, fyee vali otwa limbililwa unene keendjebo da kana dili momwaalu muhapu ashike kapena ouyelele kutya onda kufa mo kulyelye,” Ndeitunga ta ti.
Okwa ti oshififa ohoni unene kovanhu tava va ke eendjebo dihapu onghee okwa yelifa ta ti ombelewa yaye otai kakwashipaleka kutya oya ningila omakonakono eendjebo do vapolifi aveshe moshilongo.
Okwa ti ouyelele otau ka yandjwa moshiwana konima ngeenge omakonakono okwa pu okuningwa uli kombinga yeendjebo edi dava kwa monhele yokupungula oilwifo yopolifi.
“Konima ngeenge omakonakono okwa pu okuningwa ohatu ka patulula oshimbofa kombinga yeendjebo dava kwa po,” Ndeitunnga ta ti.
Ndeitunga okwa weda po ta ti oshiwana ina shi landula ouyelele woipupulu ou tau tandavelekwa komalungula kombinga yoshikumungu sheendjebo da kana.