Ngoloneya woshitukulwa shaMaheke Pijoo Nganate okwa ninga oshikonga shokutalela po ovanhu ve na oulema moshitukulwa shaye Etine fiyo Etitano ladjako.
Eshi ngoloneya okwe shi ninga nelalakanano okudidilika omashongo a talelwa kovanhu ve na oulema wa yooloka nokukundafana nghee e na okukala a kandulwa po.
Ngolonaye Nganate okwa lombwela Kundana ta ti ombelewa yaye otai lalakanene okukala ya yandja omayakulo kovanhu ve na oulema shaashi okwa didilika kutya ihava pewa omayakulo a wana. Okwa ti okwa kala ta talele po oikandjohoololo ya yooloka yomoshitukulwa omo a ninga omutumba novanhu novanaulema oshoyo ookansela opo va kundafane kombinga yomashongo eva taalela.
“Okwa li ndev apa omhito opo keshe omunhu a popye kombinga yonghalo omu eli naasho va hala okuningilwa kombelewa yange,” Nganate ta ti.
Okwa ti osha fimana ngeenge ngoloneya ta talele po ovanhu vomoshitukulwa shaye shaashi eshi otashi ningi oilonga yaye ipu nokukala a didilika eemhumbwe doshiwana.
Nganate ta weda po kutya ovanhu tava lumbu noulema navo ovanhu ashike ngaashi ovannhu aveshe onghee oshiwana nashi xulife po okukala tashi va tongola ile tashi va ningile ominyonena.
Okwa ti ombelewa yaye otai ka tula moilonga oinima ihapu kombinga yoku xulifa po mashongo a taalela ovanhu ve na oulema ngaashi okutunga oupangelo veli popepi, oku va ningila oupomba vomeva noku va pa outemba.
“Onda didlilika kutya ovanhu vamwe ove na ohokwe yo kuya kofikola, omanga vamwe ove na ounongo wokulonga oinyangadalwa yokeenyala,” Nganate ta ti. Ta ti ombelewa yaye otai ka longela kumwe mouministeli wehongo lopombada opo va tungilwe endiki lopaungomba. Okwa kunghulila oshiwana opo shi twikile nokukala tashi tonatele ovakwapata vavo ovo itava dulu oku li yambidida nawa, opo va ha ninge oihakanwa yoilonga you lingilingi hai ningilwa ovakwashina ovo ve na omaunghundi onhumba.