Omazemburukiro oyetjavari wEyuva rOmazemburukiro wOtjiṱiro Otjindjandja maye utu ndino ndi ngurova mOkatutura poruveze romaworonganeno rOmiko Omikutasane ndu tjiukwa otjOUN Plaza munda mbwina nOKFC momurari mbwi Openning.
Ozombara zOvaherero nOvambanderu nḓeri kongotwe yomasembamisiro womazemburukiro nga ndino ndi ngurova maze tokerwa amaze rihangununa kotjiwaṋa na wina okuhandjaura kutjo omboronganeno yazo oyo ndji tjiukwa kutja omborongeneno ya Kandjoze.
Otjomuano wokurongerisa otjiwaṋa kovitjitwa ongondoroka nEyuva rOmazemburukiro wOtjiṱiro Otjindjandja. Ovyo mbiri okuza mOsondaha, Omandaha ngandu tji mavi wire mOritjavari, tji ye ri 28 ku Kambundu, oro ngeri omayuva nga kekerwa Omazemburukiro weyuva rOtjiṱiro Otjindjandja. Otja kombepo yo 2016 mOmbongarero yOtjiwaṋa otjo ndji ya yakura nokuhina okaṋepo kemwe ku kehaama mondjuwo ndji kapitasana nombepo ndji.
Kutja tji ye ri 28 ku Kambundu mari sokuririsiwa kotjiveta otjEyuva rOmazemburukiro wOtjiṱiro Otjindjandja. Kutja ehi arihe ri tjiwe nao nu rizemburuke. Tjandje ra rire kotjiveta kutja eyuva romasuviro poo eyuva ehuze kutja kari ririre eyuva romasuviro. Okuza kombura ndja zuko ozombara nḓa otji za utire okuzemburuka eyuva ndi notjitjitwa tji za kara natjo pOruveze rOmbwikiro yOviuṋe Vyongutukiro mondivitivi yotjihuro mOmurari mbwi Orobert Mugabe.
Osondaha okuza poruveze rOmihoko Omikutasane ovitjitwa otji mavi utu novitjitwa vyombazu tjimuna outjina nomuhiva amaavi pata nomayakisiro wotumunine otjiwaṋa pu matji tokerwa moruhoze.
Omandaha ozondangere aze tjirwa amaze yakisa ezuko romaundjiro na pe uhara omaraisiro woviperendero vyOtjiṱiro Otjindjandja. Ongurova amai pata notjihungiriro ohunga nOtjiṱiro Otjindjandja.
Oritjavari otjiwaṋa otji matji tjirwa amatji toora orukongo okuyenda pehi kotjihuro ngandu poruveze romapwikiro woviuṋe vyomakuruhungi wongutukiro opo pu mape kakara omazemburukiro weyuva okuuta mohinga yomuvyu otjiwaṋa tji matji tjirwa amatji worongana ngandu moimwe yomahatenya ozombara novaheṋendu tji mave twa otuzenga pombindi yOtjiṱiro Otjindjandja.