Omukainhu weedula 51 okwa xulifa eshi a lyatelwa kotuwa pondingosho efimbo lokomatango pOndobe poKahenge moshitukulwa shaHangwena Etitano.

Nakufya okwa tongolwa oye Lydia Weyulu, omuhongifikola. Omunakonani woimbuluma wopolifi moshitukulwa shaHangwena omupedu Commissioner Zacharia Amakali okwa hokolola ta ti nakufya okwa li eli omutumba pondingosho tali okapana efimbo lokomatango eshi a dimbuka kofikola.

Vati mupya munene okwa ka dja otuwa tai shingwa unene ndele tai lidenge motuwa ikwao ei kwa li tai di kEenhana ya yuka kOnhuno.

Okwa ti omushingi wotuwa okwa ka nyengwa eenghono kotuwa yaye ndele tai di ko kopate fiyo tai keli denga pondingosho apa kwa li pena Weyulu. Nakufya eshi auda omalinyengo eetuwa deli denga mumwa, okwa li ta kendambala ngeno okufaduka po ashike mupya munene kombinga oku kwa li ta lotokele oko a hanga kwa yu ka otuwa ei ya ponhoka kopate.

Weyulu okwa lyatelwa kumwe nekuma lofitola shaashi okwa hangika vati ta ende pekuma pefimbo kwa li tafaduka po. Okwa xulifila mondjila pefimbo kwa li ta twalwa koshipangelo shaEenhana. Ovakwapata vanakufya ova shiivifilwa efyo laye, nomakonakono opolifi ota twikile. Amakali okwa kunghulila oshiwana opo shi kale tashi shingi nakashona ngeenge tashi ende peenhele di na omalukanda eli popepi nopate. 

Amakali okwa koleka yo efyo lomukulupe weedula 73, eli mangeleka Olomakaya efimbo lokongoloshi potundi 21h50 momati uli mepya laye momukunda Onailonga, moshikandjohoololo shaMulonga. Nakufya okwa tongolwa oye Moses Petrus omukalimo womomukunda Onailonga. Opolifi oya ti nakufya okwe li tuwa kovaneumbo laye eli meemhango a fya nale, nokonima ovaneumbo vaye ova shiivifila opolifi. 

Petrus ina fiya po omukanda washa tau yandje ouyelele kombinga yeshitifi shefyo laye. Opolifi moshitukulwa Erongo nayo oya koleka efyo lomunambelewa wopolifi weedula 28 a fya eshi eliyasha nondjebo yaye mwene efimbo longuloshi potundi 21h00 monduda yaye koNarraville modoolopa yaWalvis Bay.

Nakufya okwa tongolwa oye Gideon Jambeko Mbinga omukalimo womodoolopa yaWalvis Bay.

Opolifi oya ti vati Mbinga okwa fiya po omukanda u na ouyelele kombinga yefyo, onghee ouyelele uli momukanda tau ka yandjwa nale.

Omakonakono opolifi ota twikile.