Omukulupe weedula 60 omukwashiwana waSouth Africa okwa nyekwa oshimaliwa tashi li shilile poN$240 000kookalyamupombo Omaandaxa potundi 11h30 pofitola hai landifa oihape modoolopa yaWalvis Bay.
Omupopiliko wopolifi moshitukulwa Erongo Inspector Ileni Shapumba okwa hokolola ta ti omukulupe okwa li a ka tala oshimaliwa keengeshefa daye koWalvis Bay, nokonima okwa ka pita pofitola opo a ka udife ombapila yokutwala oshimaliwa kombaanga.
Opolifi oya ti eshi omukulupe a mana okuudifa ombapila yokombaanga okwa kufa ekutu omu muna oshimaliwa ndele ta ende ouka kotuwa yaye ei kwali yakanghamekwa pondje yofitola.
Vati eshi ta hala okufika potuwa yaye okwa dja ovafekelwa vavali ndele tava nyeke ko ekutu loimaliwa, omanga omufekelwa omutitatu okwa li eli omutumba motuwa a telela vakwao opo va faduke po.
Omufekelwa umwe okwa endelela opo a katwe elola lotuwa yomukulupe ndela naye ta nukile motuwa.
Opolifi oya ti ovafekelwa ova faduka po veli motuwa yoPolo ina onomola yoipupulu N9269 S konima omanga komesho okuna onomola N9654 S. Vati omukulupe eshi a pulwa kopolifi okwa ti ovafekelwa ove mu landula okudja kofitola oku kwali a ka tala oshimaliwa.
Kapena omufekelwa a kwatwa po fiyo opapa, onghee omakonakono opolifi otaa twikile. Oshiningwanima shikwao osha lopotwa moshitukulwa shaShana mOngwediva eshi ovafekelwa vahamano va ponokela ondingosho yoTripple Seven efimbo 20h30 Omaandaxa.
Omupopiliko wopolifi mOshana Inspector Thomas Aiyambo okwa hokolola ta ti ovafekelwa okwa li vena omakatana neembele tava pula omukainhu ou halandifa mondingosho apa pena eeshapi domashina oshimaliwa nodopokakefa kokutuvikila oshimaliwa. Opolifi oya ti ovafekelwa ova tameka okuningila omukainhu omatilifo novalandi va hangika pondingosho efiku olo.
Okudja opo ovafekelwa ova tameka oku teya omashina oimaliwa ndele tava kufa mo oshimaliwa shihapu shili momwaalu inau shivika natango.
Konima eshi ovafekelwa va kufa mo oshimaliwa ova katwa omalola lotuwa yamwene wondingosho ei kwali ili pondje, ndela tava i motuwa yoPolo ina onomola yaSouth Africa nokufaduka po.
Opolifi oya ti kapena omunhu a monifwa oshiponga, nomakonakono opolifi otaa twikile. – fhamalwa@nepc.com.na