Omulumenhu weedula 45 vati okwa dipaa omukulukadi waye ndele naye mwene teli mangeleke nongodi yolusheno meumbo lavo mOkahao pokati komafiku 31 Okotoba nomafiku 3 Novomba.
Omulumenhu okwa tongolwa kutya oye Epafras Nambundunga a dile komukunda Uukwalumbe. Omanga inava hombola omukulukadi waye oye Aina Kandali Nangolo weedula 38 okwa dile komukunda Okangala.
Omukonakoni woimbuluma wopolifi moshitukulwa shaMusati omupedu Commissioner Moses Simaho okwa hokolola ta ti omalutu avo okwe li tuwa meumbo lavo Etitatu efimbo longula potundi 08h00 a ninga nai.
Omalutu avo okwa twalwa kokila yopolifi yaKahao opo a ka ningilwe omakonakono. Ovakwapata vavo ova shiivifilwa kombinga yomafyo avo. Opolifi moshitukulwa shaShikoto oya koleka yo olutu lomulumenhu weedula 41 la hangika moixwa la ninga nai lili moinimbu exuliloshivike ladja ko, momukunda Onashiye.
Oinimbu imwe ngaashi omutwe nofingo oya hangika ili meemhango domuti omanga oinimbu imwe oya hangika pedu tai lika koudila.
Okwa tongolwa oye Ekonia Ekanga Nghilifa a dile komukunda Ohashimbamba, nokali omunailonga kofaalama.
Opolifi oya hokolola kutya Nghilifa okwa ninga omafiku ta kongwa konima eshi kwa li a kana okudja momafiku 09 Kotoba neudo, omo kwa vaha li ovanhu ve eshi kutya okuli peni.
Opolifi oya ti olutu laNghilifa ole li tuwa komuendanandjila oo shiivifila opolifi. Otaku fekelwa ngaho kutya okwa fa eli kufa omwenyo ye mwene, ashike ina fiya po omukanda tau yandje ouyelele kutya okwe shi ningila shike.
Olutu laye ola twalwa kokila yopolifi kOmuthiya opo li ka ningilwe omakonakono, novakwata vaye ova shiivifilwa efyo laye. Omakonakono opolifi ota twikile kombinga yomalikufomwenyo aishe avail.
– fhamalwa@nepc.com.na