Omupopiliko wopolifi moshitukulwa Erongo Inspector Ileni Shapumba okwa koleka kutya opolifi oya kwata po omulemenhu weedula 45 konguloshi yEtine mekwatafano nedipao lomukulukadi waye. 

Otaku hokololwa omukainu a hangika a fila pondje yoeumbo lavo yavo, a yashwa momutwe oufiku wEtine moWalvis Bay.

Nakufya okwa tongolwa kutya oye Engela Borruso Strydom weedula 48.

Shapumba okwa hokolola ta ti omufekelwa okwa li tava nu ponhele ili modoolopa pamwe nomukulukadi, nokonima vati omukulukadi okwa ka dja po ta ti otai keumbo.

Eshi omufekelwa a pulwa kopolifi kombinga yefyo vati okwa lombwela opolifi ta ti okwa hanga omukulukadi waye a fila pondje yeumbo lavo konima eshi e mu landula a tale ngeenge okwa fika tuu keumbo. Vati omukadi okwe li yasha ye mwene nondjebo moshipala, ashike omakonaakono opolifi okwa ulika kutya omukainhu ou okwa yashwa oku dilila kekofi.

Opolifi eshi ya twikila noku ninga ekonaakono oye ke li twa mondjebo oyo ya longifwa medipao ili koshi yoshiwilo. Ponhele opo tuu opo opa hangwa oipatolona yeeholo itano ya longifwa nale. 

Ovakwapata vaStrydom ova shiivifilwa efyo laye nomudimba waye owa twalwa kokila yopolifi yaWalvis Bay opo u ka ningilwe omakonakono.

Omufekelwa ota holoka momangu yangestalata waWalvis Bay nena, nomakonakono opolifi ota twikile.

Lopokati opo Shapumba okwa koleka efyo lomulumenhu weedula 54, a fya eshi a lyatwa kotuwa efimbo lokonguloshi potundi 20h10 moKuisebmud modoolopa yaWalvis Bay. Nakufya oye Usiel Gaseb omukalimo womoKuisebmud.

Opolifi oya ti omushingi wotuwa Nissan Tida ou a lyata Gaseb pefimbo ali ta kendabala oku tauluka opate, okwa li ta shingi eli koshi yomaludu. 

Ovakwapata vaGaseb ova shiivifilwa efyo laye.

Omakonakono opolifi ota twikile.

– fhamalwa@nepc.com.na