Omupopiliko wopolifi moshikutulwa shaShana Inspector Thomas Aiyambo okwa hokolola ta ti oumbudi weetuwa mOshana owa hanya. Ta ti ombelewa yavo ohai kala nokulopotelwa oimbofa ihapu yeetuwa tadi vakwa po.
Okwa ti unene tuu odoolopa yaShakati oyo imwe ya didilikwa ina oumbudi weetuwa wa londa pombada eshi ovanhu va kanifa eetuwa davo dava kwa po kookalyamupombo.
Aiyambo okwa ti unene tuu momafiku omexulilo shivike oo unene ookalyamupombo ve hole okukavaka eetuwa pomaumbo ovanhu pefimbo loufiku ngeenge va kofa.
Okwa ti unene eshi twa yuka pefimbo lomatango manene opo unene oilonga youmbudi hai kala ya anye eshi ookalyamupombo hava kala tava kongo oixupilo mokuvaka po omaliko ovanhu.
“Ohandi kunghulile oshiwana opo shi xulife po okulondeka ovanhu omaufiku shaashi ookalyamupombo ove hole okulefa eetuwa oufiku tave ningifa vafa ovatwalelwa voshili ashike mboli ovena elalakano lokunyeka po eetuwa dovanhu,” Aiyambo ta ti.
Okwa ti unene tuu ovashingi veelefa navo ova ninga oihakanwa yokunyekwa eetuwa davo oufiku eshi ve hole okutwalela ovanhu.
“Ovashingi veelefa oha kala vangudumana koitaashi yopolifi veu ya okulopota eshi vanyekwa eetuwa davo kovatwalelwa vookalyamupombo. Onghee oshiwana na shi xulife po okukala tashi shingi efimbo loufiku shaashi oshanyika oshiponga neenghono eshi ovanhu hava kala veli unganeka oungudu tava nyeke ovashingi eetuwa,” Aiyambo ta ti.
Okwa ti konima ngeenge ovashingi va nyakwa eetuwa davo hava dangwa ndele tava nyekwa oimaliwa yavo ei va longa mopate efiku olo.
Aiyambo okwa ti oshiwana na shi kale shili oupafi ngeenge sha kofa shaashi ookalyamupombo ove hole okulivakela pomaumbo ovanhu ngeenge va kofa tava kunghula apa pena otuwa.
Okwa ti ovanhu na kale tava patele etuwa davo moitenda ile momiti nokukala va tula oungedjo metuwa opo va kale tava kwena ngeenge otuwa ya patululwa komunhu shaashi eshi osho omukalo tau dulu okukelela eetuwa diha kwe po pomaumbo.
“Ovanhu nava kala tava longele kumwe vena oushiinda muwa opo va kale tava lopotele opolifi ngeenge va mono eetuwa dovashiinda shavo tadi vakwa po,” Aiyambo ta ti.
Aiyambo okwa ta ti oshiwana nashi kale shina eengodi dopolifi opo shi kale tashi lopotele opolifi efimbo kombinga yoimbuluwa.