Eshi oshilongo sha fika vali pefimbo lomuloka, ovakalimo moshikandjohoololo Ogongo ove li kwata vali ombada mutwe shaashi ku na omafiku manini onghalo i lunduluke eshi tava tameke oku yauka moyana yomeva.
Kansela woshikandjohoololo shaGongo Daniel Megameno
okwa hokolola ta ti moshikandjoololo shaye omuna omikunda dili momhumbwe yeepate. Kansela okwa ti pefimbo lodula ovanhu ohava mono oixuna keendjila, neefikola noupangelo hava pate shaashi eepate ohadi kala dili koshi yomeva.
Magameno okwa hokolola ta ti ngeenge odula yapimbile naye ihadulu vali nokuya koilonga shaashi opate yauka kombelewa yaye ohai kala ili koshi yomeva.
Okwa ti omikunda ngaashi Oluteyi, Ombanda, Eenkondombali, Ongulugumbe, Eembwa, Pyamukuyu, Iipanda, Onangombe, Onamundindi, Omatelekelo nOmbathi odo dimwe da didilikw dina eefikola noupangelo hava pate pokulombo.
Megameno okwa ti pefimbo lodula ounona vanini ihava i vali keefikola shaashi ihava dulu oku tauluka omeva, omanga ovahongifikola vena eetuwa ihava i vali koilonga shaashi eendjila ohadi di kala dili koshi yomeva.
“Ombelewa yange oya lopotela ombelewa yangoloneya kombinga youpyakadi weendjila ashike kape na eshi shaningwa po fiyo onena,” Megameno ta ti.
Okwa ti epate dimwe odina efululu, omo ngeenge ovanhu va hala okuya koupangelo ihava dulu vali shaashi eetuwa ita didulu okupita mefululu.
Megameno okwa weda po ta ti oshikandjohoololo shaGongo osha talela omhumbwe youpangelo shaashi ovo veli po inava wana.
“Ovanhu ohava ende eendjiladiledile tava ka konga ouhaku koupangelo vokokule, omanga vamwe ohava kala ashike veli momaumbo tava vele shaashi itava dulu okuya koupangelo veli kokule,” Megameno ta ti.
Okwa kunghulila oshiwana shomoshikandjohoololo shaGongo opo shi kale shangumana omanga epangelo tali kendambala nokuninga omalongekido okukandula po omukundu womhumbwe yeepate.