Festus Hamalwa
Ovakalimo vokolukanda Otweya modoolopa yaWalvis Bay osho vai momaumbo avo konima eshi va kale tava di meetenda efimbo lile shaashi eebashu davo dapya po omudo wa djako muJuli.
Ovakalimo ova tameka okulongifa omaumbo avo okudja Omaandaxa shaashi paife okwa pwa okulonga, omo keshe eumbo ola tulwa olusheno nomeva.
Ovakwashiwana ova holola ehafo linene eshi va mona omaumbo paife, ova ti kutya ova pandula eshi itava kala vali tava di meetenda shaashi meetenda ova kala tava monele mo oixuna unene tuu pefimbo loutalala.
Yolokeni Johannes okwa kala a di meetenda okudja omudo wadja ko muJuli konima eshi obashu yaye yapya po filufilu aishe, okwa popya ta ti okwa pandula epangelo laNamibia eshi lina oshisho noshiwana eshi va tungilwa omaumbo eli pashinanena.
Johannes okwa kungulila vakwao aveshe va mona omauwa omaumbo opo va kale tava futu oifuta yomeva, olusheno nondado yomaumbo ei ya tulwa po okukala tava futu keshe komwedi shaashi omaumbo ina va pewa oshali.
Omudo wa djako kolukanda Otweya modoolopa yaWalvis Bay okwa pya eebashu 121 efimbo lokonguloshi, omo ovakalimo kwa li va kanifa omaliko avo ayeshe nomwenyo wokaana ka shona kokamati kodula imwe.
Ovakalimo ava ova kala hava di meetenda odo kwa li va pewa kepangelo oule wodula nemweedi mbali.
Pefimbo ovakalimo tava pewa omaumbo avo, kansela woshikandjohoololo shaWalvis Bay yokoushai Florian Tegako Donatus okwa holola ehandu laye eshi a popya ta ti ovanhu vamwe ova longifa oulingilingi mokuyandja omaumbo kovanhu ina va nuninwa okukala va pewa omaumbo kwa li.
Okwa yelifa ta ti omusholondodo omadina wovanhu kwa li veli shangifa okupewa omaumbo owa lundululwa ndele tamu tulwa omadina amwe ovanhu kwa li ina va shangwa okupewa omaumbo.
“Paife ovanhu vamwe ova xupako okupewa omaumbo avo shaashi ovakwateli komesho tava ungaunga nomadina ovanhu vena okukala va pewa omaumbo ova lundululwa omadina, naashi osha eta opo ovanhu vamwe va kale ina va mona vali omaumbo avo ngaashi kwa li vatelela,” Donatus ta ti.
Okwa ti otai indile opo ovanhu va kale va talula omusholondodo womadina ovanhu kwa li vena okukala va pewa omaumbo opo omadina avo a kale a shunwa mo.
Okwa weda po ta ti oshiwana na shi xulife po okukala tashi longifa oulingilingi wokuningila ovanhu vamwe omauma omanga vamwe itava tali kako va fimana.