Festus Hamalwa
Ovakalimo vamwe vomukunda Onamulunga B ovatunhilwa konima eshi va lya ombelela yandongi ya monika omukifi wendabi.
Otaku hokololwa ovakwashiwana ava va dipaa noku lya ombelela yondongi konima eshi va uda kutya oya yalya omulumenhu womumukunda komadi. Ovakalimo vopomudingonoko opo okwa li veli topolela ombelela yandongi omo kwa li vamwe va ninga eedingi.
Edi oda popiwa kukansela woshikandjohoololo shaNiipa Tully Nuunyango eshi a ninga eenghundafana naKundana Omaandaxa ta hokolola ta ti ovanhu veli 43 ovatunhilwa koshipangelo shaNandjokwe konima eshi va lya ombelela yandongi e na omukifi wendabi.
Nuunyango okwa ti ombelewa yaye oye shipondola opo ikale ya yandja ouyelele kovanhu va lya ombelela yandongi opo va kale va katunhilwa mendelelo shaashi osha nyika oshiponga ngeenge ova dopa okukala ina vatunhilwa.
Okwa popya ta ti nokonima eshi ondongi ya ningilwa omakonakono konambelewa hava longo nomikifi doimuna oidjemo oye keya tai u like kutya ondongi oina omukifi wendabi, naashi osha ka eta opo ovakalimo va kale vena oumbada komina eshi va lya ndongi.
Okwa kunghulila oshiwana ta ti kukeshe omunhu a lya ombelela yandongi e na omukifi wendabi na kale a kavendwa mendelelo koshipangelo keshe shili popepi naye.
“Ovanhu na vaxulife po okukala tava li eembelela doimuna ina omikifi shaashi eshi otashi dulu oku etela ovanhu vakwatwe komifki da yooloka,” Nuunyango ta ti.
Okwa lombwela oshiwana opo shi kale shili oupafi neendongi shaashi paife okwa didilikwa moshikandjohoololo shaye mweliteya omukifi wendabi moimuna ngaashi meembwa, noumbishi neendongi.
“Ovadali nava kale tava tonatele ounona vavo opo va haninge oihakanwa yokulika keendongi unene tuu ounona veli meendodo dopedu,” Nuunyango ta ti.
Okwa ti omulumenhu ou kwa li a lika kondongi okuli moshipangelo shaNandjokwe natango a tetwa omadi imwe.
Okwa ti ovanambelewa vokukonakona omikifi doimuna ova tameka noshikonga shokutunhila eembwa noumbishi moshikandjohoololo shaye shaashi vati okwa didilikwa eembwa odo dimwe tadi tandaveleke omukifi wendabi meendongi.
Kansela okwa ti etunhilo leembwa otali kaleke po yoo vali eameno lounona va shona ve hole okudauka neembwa shaashi ngeenge okaana oka lika kombwa yavendwa ohashi kelele okaana ka kwatwe komukifi wendabi.
Okwa weda po ta ti ovanhu nava kale tava longele kumwe novanambelewa pefimbo tava tunhile eembwa ile oumbishi momaumbo avo.