Kansela woshikandjohoololo shaGongo Daniel Megameno okwa ti ovanyasha vomOgongo ova pumbwa edu lili popepi noCanala komeva opo va kale tava longo oinyangadalwa yavo younamapya ngaashi oikunino.
Megameno okwa ti otai indile oovene vomikunda opo va yandje edu kovanyasha lili popepi noCanala komeva opo ovanyasha va kale tava longifa omeva okudja moCanala.
Kansela edi okwe di popya eshi a ninga eenghundafana naKundana Etine eshi ta hokolola kombinga yovanyasha vomOgongo vena ohokwe younamapya, ashike ova talela eshongo ledu apa tava ningi oinyangadalwa yavo younamapya.
Megameno okwa ti oinyangadalwa younamapya oya fimana kovanyasha shaashi eshi otashi kwafele ovanyasha opo va kondjife ondjala noluhepo tashi pitile mounamapya.
“Ngeenge ovanyasha ova pewa edu lili popepi noCanala eshi otashi kala shipu konyasha opo va kale tava longifa omeva noupu okutekela oimeno yavo,” Megameno ta ti.
Okwa ti ombelewa yaye oya kala nokuyakula omanyenyeto ovanyasha tava pula va hala okupewa edu lili popepi nomeva opo va tameke okuninga oinyangadalwa younamapya ngaashi naana ovanyasha vokoikandjohoololo ya yooloka vena oikunino yavo.
“Elalakano lovanyasha opo va kale va pewa edu lounamapya okushakeneka epangelo ondjilakati nokukandula po omukundu wo ku ena oilonga,” Megameno ta ti.
Okwa ti ovanyasha otava ka kala vena omhito iwa yokukala va yandja oilonga kovanyasha vakwao vomoshitukulwa shaMusati.
“Ovanyasha otava ka kala tava kunu omaludi oikunomwa hai liwa opo va kale tava landifa komandiki omangeshefelo,” Megameno ta ti.
Kansela okwa ti ombelewa yaye otai ka ninga omalongekido okudilila kouministeli wounamapya opo ovanyasha va kale va mono omadeulo kombinga nghee tava ka kala tava longo oimeno ya yooloka.
Okwa ti ovanyasha otava ka yambidindwa kelelo lopaukansela lomoshitukulwa ngaashi okulanda oilongifo yokulongifa moikutunino yavo.
Okwa indila oshiwana opo shi vawaimine mokuyambidida oinyangadalwa yovanyasha noshimaliwa ile noilongife yapumbiwa.
Kansela okwa kunghulila ovanyasha opo va kale vena ohokwe yokulonga nelitulemo moinyangadalwa yavo younamapya.
Okwa weda po ta ti ovanyasha aveshe ova manguluka okukala va kufa ombinga moinyangadalwa younamapya.
“Ovanyasha longeleni kumwe, nye topolelafaneni ouyelele nounongo kombinga nghee ta mu kalongo moprongalama yeni younamapya,” Megameno ta ti.