Kansela woshikandjohoololo shaTamanzi Johannes Iiyambo okwa hokolola ta ti moshikandjohoololo shaye omuna ovanhu tava mono oixuna kenota lomeva eshi eepomba dimwe itadi longo vali omanga omifima dimwe oda pwiinina.
Iiyambo okwa ti oshiwana paife ohashi ende endjiladiledile tashi ka konga omeva komikunda dokokule oku kuna eepomba tadi longo omanga vamwe ohava ende oshinano 15km tava kateka keendungu.
Kansela okwa ti omikunda ngaashi Onkaankaa, Otapatapa, Oshaandjumbala, Omatha, Iiyekeya, Otsalindi, Onanyalala, Omaputu Ga Shiimba, Okambwini, Ohango, Ondjungulume odo dimwe dina ovanhu tava dengwa kenota moshikandjohoololo shaye.
Kansela edi okwe dipopya eshi va ninga eenghundafana naKundana Omaandaxa eshi kwali ta hokolola nghee oshiwana shili momhumbwe yomeva moTamanzi.
Okwa ti paife oule weemwedi mbali ovanhu tava dengwa kenota ve e na omeva okunwa nokutelelaka momaumbo.
Kansela okwa ti eefikola dimwe dili hamano odina omhumbwe yomeva eshi ominino domeva ta fita iha di longo vali, omo paife ovanafikola to hange ashike tava kwena enota keefikola.
Efikola ngaashi Iiyekeya Primary school, Etemba Primary, Onanyanyala Primary, Dr Ndeutala Angolo Combined school, Onanyanga Primary, Tk Ndilimani Iipumbu Primary odina omeva a pata paife oule weemwedi mbali.
Iiyambo okwa ti ovanafikola vamwe oha ningi onghendambala dokuetelela omeva vavo okudja komaumbo oshoyo novahongifikola vamwe navo ohava etele ounona vofikola omeva. “Oomeme vena ounona va shona, noomeme veli humbata oto hange tava ende eendjiladiledile tava ka teka omeva komikkunda dokokule, omanga ovakulupe vamwe momaumbo oveli mo tava dengwa kenota shaashi vo ohava dulu okuenda eendjiladiledile va ye katambi lomeva,” Iiyambo ta ti.
Okwa ti ovanhu vamwe ohava lande omeva kovakwashiwana ava vena eetuwa hava kateka omeva ndele tave u ya okulandife kovakwao, omo edini limwe lakula hali landifwa keedola N$25.
Okwa ti nokapangelo Amarika oke na oupyakadi womeva a pata eshi ominino iha u longo vali, ashike omafimbo amwe ohapa etwa endoloma domeva pokangelo opo.
Ngoloneya woshitukulwa shaMusati Erginus Endjala okwa ti ombelewa yaye oya didilika omhumbwe yomeva koshikandjohoololo shaTamanzi konima eshi kwali a lopotelwa kombinga yovanhu tava dengwa kenota. Endjala okwa ti ombelewa yaye oya shiivifila ehangano lokuyandjaneka omeva moshilongo loNamwater opo li kale la kandula po omukunda ou diva.
“Ohatu ka ninga omutumba nelelo lopaukansela lomoshitukulwa shaMusati opo tu kundafane nghee oupyakadi womeva tau kandulwa po moikandjohoololo aishe ina omhumbwe yomave shaashi onda lopotelwa oshitukulwa shaMusati muna oikandjoololo ihapu ina oupyakadi womeva,” Endjala ta ti
Okwa kunghulila oshiwana opo shi kale shangunguma omanga ombelewa yaye tai kandula po omukundu ou.