Ehangano loProgram for Young Politician in Africa ola yandje oututa veli 720 kovanafikola voukandona vo kofikola Endjati Combined School moshitukulwa shaShana, mOmaandaxa.
Efiku tuu olo ovanafikola ova pewa yoo vali oikwafifo yofikola ngaashi eepena nomambo okushanga. Moshipoiwa shaye pefimbo ta tambula ko oikwafifo ya pewa ovanafikola kansela woshikandjohoololo shaKatana Edmund Iishuwa okwa ti okwa pandula ehangano PYPA eshi la yambidida ovanafikola noututa.
Kansela okwa ti ovanafikola vopofikola Endjati ovo vamwe va didilikwa va kale ve na omhumbwe yoututa, omo ovanafikola vahapu hava faula keetundi ngeenge veli komafimbo opaushitwe.
Iishuwa okwa ti ehangano loPYPA okwali la tuma omukanda kombelewa yaye kutya ola hala okuyambidida eefikola domoshikandjohoololo shaye, naashi osha ka eta opo kansela a tofe mo ofikola Endjati shaashi oyo imwe ina omwaalu muhapu wounona voukandona va talela eshongo loututa.
“Ohandi indile omahangano makwao ile ovanangeshefa opo veu ye va yambidide oshiwana shomoshikandjohoololo shange shaashi natango moshikandjohoololo omuna ovanhu tava mono oixuna kondjala nosho yoo oipumbiwa ikwao ngaashi omidjafikola da pumbiwa kovanafikola vamwe,” Iishuwa ta ti. xKansela okwa ti kukeshe ou e na ehalo lokuyambidida ovanhu vomoshikandjohoololo shaye na vakwatafane nombelewa yaye.
Werner Fredrik omukulunhuwiliki wehangano loPYPA koshitukulwa shokonooli okwa ti ehangano lavo ola totwa nelalakano opo li shakaneke epangelo ondjilakati.
Fredrika okwa ehangano lavo olina ondjodi opo li kale la yandja oututa kovanafikola voukadona veli momhumbwe yoututa keefikola dokoitukulwa yokonooli. “Natu kaleni a tu yambidida ounona voukadona noututa shaashi eshi otashi yandje ohokwe kovanafikola yokukala tava i keetundi nokukala yoo vali tave litulamo moinyangadalwa yavo yofikola,” Fredrika ta ti.