Opolifi koitukulwa ya yooloka moNamibia oya koleka omafyo ovanhu va hetatu va kanifila eemwenyo davo mexuliloshivike.
Ovanhu ava va xulifa omwa kwatelwa omukulupe a pila mobashu nokatekulu waye, ovanhu vavali ova fila metale eshi kwali tava kwata eeshi, omulumenhu a tuwa nombele, novanhu vatatu ova fila moiponga yotuwa moShana noMusati.
Omupopiliko wopolifi moshitulwa Erongo Ileni Shapumba okwa hokolola ta ti omulukupe weedula 83 nomutekulwa waye e na odula neemwedi hetatu ova fya Olomakaya eshi va pila mobashu yavo efimbo loufiku potundi 23h50 komukunda Okombahe. Okwa hokolola ta ti obashu yomukulupe oya yaka omundilo pefimbo kwali aveshe va kofa nomutekulu waye, ashike vati eshi ovashiinda ve u ya okudima omundilo inava dula oku pondola sha shaashi vati kappa li omeva oku dima omundilo. Omukulupe nomutekulu waye va fya eshi vapya po filufilu.
Opolifi oya ti omaliko ayeshe omukulupe okwa pila mobashu neenduda dimwe domeumbo nado oda pya po.
Opolifi oya ti kape na ouyelele kutya omundilo owa etwa koshike, nomakonakono opolifi ota twikile.
Ovakwapata vavo ova shiivifilwa omafyo avo. Ovanhu vavali ova fya eshi kwali tava kwata eeshi metale Olomakaya moshitukulwa shaMusamuti komukunda Oupale efimbo lomutenya.
Opolifi oya hokolola kutya ovanhu okwa li tava kwata eeshi navakwao metale veli vahamano, ashike vati okwa li tava kendambala oku enda va u ka mokati ketale tava ti kutya ova hala okukayowa.
Vati eshi tava ende va u ka mokati ova ningina koshi yomeva nokuxulifa efimbo tuu olo. Ovakwashiwana kwali tava kwata navo eeshi ova lopotela opolifi nokonima eshi opolifi ya fika oya kufa mo omalutu avo ndele taa twalwa kokila yopolifi kuEtayi. Ovakwatapa vavo ova shiivifilwa kombinga yomafyo avo.
Omupopiliko wopolifi moshitukulwa shaShana Inspector Thomas Aiyambo okwa koleka efyo lomulumenhu weedula 31 a fya eshi a tuwa nombele yo kapi efimbo lokomatango Olomakaya poundingosho pomukunda Uuvudhiya.
Opolifi oya hokolola tai ti omulumenhu okwa tuwa nombele mombandja loikando ihamano, ashike vati kapena ouyelele kutya omulumenhu ou okwa tuwilwa shike nombele.
Konima eshi omufekelwa a twa mukwao nombele ovakwashiwana vali poundingosho efiku olo ova tameka okudenga omufekelwa, omo vati kwali a dengwa unene ndele ta twalwa koshipangelo shaShakati opo a kamone epango lopaunamiti. Opoliffi oya ti omulumenhu okwa kwatwa po nonande eli ta mono epango moshipangelo shaShaka. Oonakufya aveshe ova tongolwa ovo Tsamases Theresia, Khaniseb Benhard Nadile, Julius Tuhupifa Mateus, Paulus Vatekuleni Paulusa, Wilhemina Namvula, Christina Shimopileni omanga oonakufya vamwe omadina avo ina shiivifwa natango manga. Omakonakono opolifi ota twikile kombinga yomafyo avo a yeshe.
– fhamalwa@nepc.com.na