Kansela woshikandjohoololo shaShikuku Matheus Gabriel okwa yambidida ovanhu ve na oulema vomoshikandjohoololo shaye noutemba 12 Omaandaxa.
Kansela okwa ti oshikandjohoolo shaShikuku osho shimwe sha didilikwa shina ovanhu vahapu vena oulema wa yooloka, va pumbwa outemba.
Okwa ti ombelewa yaye oya yakula omaindilo 60 ovanhu veli momhumbwe youtemba mwa kwatelwa ovakulupe nounona va dalwa noulema.
Pefimbo ta yandje outemba Gabriela okwa ti ombelewa otai lalakanene okuyambidida ovanhu aveshe veli momhumbwe ngaashi oikulya, oidjalomwa nosho tuu oipumbiwa ikwao.
Gabriel okwa ti okudja ketameko lomudo ou ombelewa yaye oha pa kala pena ovanhu vena oulema va etwa po kovakwapata vavo tava pula ekwafo loutemba naashi osha ka eta opo kansela a ka konge omakwafo komahangano opaumwene nokovanangeshefa opo ya mbidide ovanhu va pumbwa outemba.
“Ombelewa yange ohai longele kumwe noshipangelo shaShikuku kombinga nghee tuna okuyambidida tete ovanhu vena oulema tau pumbwa ekwafo lokatemba lomendelelo,” Gabriel ta ti. Okwa ti ovanhu tete ohava ningilwa omakonakono opaunamiti opo kutalike ngeenge omunhu okwa pumbwa tuu okatemba shili ile pamwe okwa pumbwa omamango.
Kansela okwa ti ovanhu vena oulema navo ovanhu ngaashi vakwao onghee osha fimana ngeenge oshiwana tashi yambidida ovanhu vena oulema nokukala ve va fimaneka, ve va hole nokukaleka po ombili.
“Ovanhu va pewa outemba vamwe ova ti kutya paife otava ka kala tava longo oilonga yavo yomeumbo noupu nokukala tava i kongeleka shaashi paife otava dulu oku ende okuya keenhele da yooloka noutemba va pewa,” Gabriel ta ti.
Kansela okwa ti otai indile oshiwana opo shi twikile nokuyambidida ombelewa yaye noutemba ile noshimaliwa shokukalandela outemba ovanhu vena oulema shaashi natango moshikandjohoololo omuna ovanhu vahapu va pumbwa outemba.
Okwa ti kukeshe ou ena ehalo lokuyambidida nakwatafane nombelewa yaye ili modoolopa yaShikuku.