Omukwateli komesho weleyenge tali lwifa oimbuluma –oWomen and Men Network mOhangwena –Nestor Moses okwa ti ovalumenhu ovo tava i momilele nounona vofikola, otava fifa oshiwana ohoni neenghono.
Moses edi okwedi popya, pefimbo opo ye, pamwe nopolifi yaHangwena, novafitaongalo va dja komaongalo a yooloka vali va ninga omutumba Olomakaya kOhaingu tau yandje ouyelele nehongo kovalumenhu nghee ve na okuxulifa po oimbuluma moshiwana.
Moses okwa ti okwa didilikwa ovalumenhu ovakulunhu ve hole okuya moixulo nounona voukadona, kashi fi ashike oshififahoni koshiwana, ashike oshimbuluma yoo shaashi osha indikwa koveta.
Ta ti okwa didilikwa Ohangwena oyo imwe ili pombada noimbofa yoimbuluma, onghee ombelewa yaye oya tokola oku ninga omutumba opo ovalumenhu va kale ve u ya okukundafava nghee vena okukala tava xwaxwameke vakwao momidingonoko davo opo kukelelwe ovakainhu nounona va ha ninge oikanwa yominyonena vali.
Omutumba ou owa li koshi yoshipalanyole omulumenhu nelunduluko, omo kwali ovalumenhu tava kundafana kombinga yoilonga youshada ngaashi omakwatonghonga, omadipao, oumbudi nomahepeko oukashike kookanhu momaumbo.
Umwe womovafitaongalo Nambili Namutewa weongalo longeleki yaHaingu okwa twa ovalumenhu omukumo veli kaleke kokule nokulongifa oingangamwifi nomaludu shaashi eshi otashi eta opo va kale tava longo oilonga yoimbuluma komaumbo.
“Ngeenge omunhu a nwa omalodu mahapu ile a longifa oingangamwifi kwatwa komhepo yokulonga oilonga ii shaashi iha kala vali eli ku ye mwene,” Namutewa ta ti.
Namutewa okwa ti ovalumenhu nava kale hava fiki peendjovo daKalunga opo vaha kwatwe keemhepo odo danyata.
Okwa kunghulila ovalumenhu opo va kale tava kongo omayelele keengeleka ile kopolifi nokovaxungimwenyo ngeenge veli hanga tava hepekwa komadilaadilo.
Moshipopiwa shaye omupopiliko wopolifi moHangwena Inspector Kaume Itumba okwa ti ovalumenhu nava xulife po okukala tava humbata oilwifo ngeenge va u ka keendingosho shaashi okwa didilika omalidipawo ahapu omOhangwena a ningilwa keendingosho.
Itumba okwa ti ovalumenhu nava kale tava yandje oshiopaenenwa shiwa kounona voumati vavo momaumbo shokukala va fimaneka ovakainhu nokukala tave li humbata nawa.