Muituti walilimo zelishumi kazelobañwi kuzwelela mwasikiliti saZambezi, sabato tuhela lituto zahae kwamutayi wasikolo salituto zepahami saUnam mwaKatima Mulilo, bakeñisa kutokwa masheleñi.
Yene ili yomuhulu wasisole sanaha Namibia John Sinvula Mutwa yana timezi kweli yefelile, nailo bulukwa kwamunzi wahae kwa Mahundu mwasilalanda saKatima Mulilo yamatakanyani. Kubulukwa kwahae nekusindeketilwe kisilutu salitobolo zelishumi kazesupile. Mutwa nafilwe kepelo yasimubuso nikupatalazwa kuba ndwalume wanaha kiMueteleli wanaha Hage Geingob.
Batimisi bamulilo neba katazehile kulika kutimisa mulilo omutuna one ucisize ndu yamuyemeli wasilalanda saKabbe yaMutulo Lamubulo. Yabona zabubangoki mwasikiliti saZambezi, mubakweli kuyomuhulu wasipokola Evans Simasiku nanitifalize taba yeo. Kono naize hakuna taba yekwaluzwi
Konahalo yakuli nabile bukaufi nimubeleki yana swalezwi kakokwani kakorona, kuhapelelize muyemeli wamulao Slysken Makando kusaya kwamuzeko, teñi babanyalani ni mulikana’ bona banyaziwa kabulyangelino bwa masheleñi alikana bolule bababeli kwakampani yaMultiChoice yaNamibia.
Naha Namibia izwelapili kubiha nombolotuna yabatu babashwa kwabutuku bwakorona. Lipiho zakazazi zamafu lisupeza kuli buñata bwa babatimela habasika pendiwa.
Liluko la sisole libulela kuli lipatisiso lizwelapili kubatisisa sene sitisize mulilo niteko yazene sinyizwe kimulilo one utukisize sipatela sa kampe ya sipokola mwa Suiderhof Lasunda.
Musalimuhulu walilimo zemashumi asilezi kuzwelela kwa Oshakati ya wiko, ulatehezwi masheleñi alikana N$100 000, kasamulaho yakulubelwa nazwisize masheleñi kabulyangelino mwasibulukelo sahae kwapanka.
Kupotela sioli sa Impalila sihulu kanako yalitabula ibanga butata, kabaka la mubu wateñi okopani ni macwe ni silelezi. Kamita kubanga tata kuzamaya kamotikala, kuli mane limotikala zenyinyani halikoni kubelekiswa mwa Impalila.
Naha Namibia ise italimani ni lindinda labulalu labutuku bwa Covid-19, mi nombolo yababa swalelwa kakokwani inze iekezeha hahulu, babañata banze balobazwa mwalipatela, silundwamanje basweli kuzinyazinya kutabiwa lindonga zasilelezo.
Your experience on this site will be improved by allowing cookies. Allow cookies