Ehi nangwari ra tandwa kutja ra iririra nu ma ri iririre kanaari kotorwa koveni mberi pandjara ndoovazu ovo oveni ka ve ri toorere ondjira imwe poo yarwe. 

Omuṱuta nai ngu novinamuinyo vye kotjiṱuve ngu kondja navyo pokati kotundjindjiri twotumbo twomahi wapeke mOkarukondwa Komatoororero Kamatako me rihungirire, no kurikwangera naṋi omambo nga maye vaza omauhonapre nge ri wo, tjinene Oministera yOtutumbo nOvikunwa, Omeva nOmatungururiro wEhi, Calle Schlettwein.  Schlettwein katjisupi wa zuvakare mozongoramambo ama tja kape notjimariva tjokuranda ozosarama zomahandurisiro tjinga Oministeri ye ai ha havara otjimariva tji tja yenene kutja i sore okuranda ozosarama zotjivarero tji matji ngara kutja i handurise mo imba mbu mave hepa okuhandurisiwa. 

Ongoramambo indji Onew Era, tji ya ri 19 komueze mbwa zuko, ya tjangere kutja Schlettwein omurumendu ngu ri mekuise mena rozopereisa zozosarama nḓa ronda eyuru no u heṋa wotjimariva na wina ozopereisa nḓe hi nonḓikameno.  

Posi ya ndiri epura romuṱuta nondekurona yovapandjare novayekwa vehi, Tjitavi Kambausuka, okookutja tjiri Schlettwein wa haka ke nomuano warwe moveta ya Namibia mu ma sokupitira okukambura ehi ku imba mbe naro. Poo hapo ma tjiti Otjikandjira, okuvatera ovakwao Ovandoitji, owo nai mbe nehi enyingi noro noho ndi ve ha randere nungwari ndi va rumata kooihe mberi kamburire kotjomasa kovaṱi novakuru. Nu wina ndi va havarere otjari kohoromende yawo yOvandoitji ndje ri kamburire kotjinyo tjondjembo kOvaherero nOvambanderu nai rihavarisa otjari kovandu vayo Ovandoitji mbeeku handura mOnamibia oruveze indo. Vozondekurona norutanga nai ndino ndu nehi indi. 

Kambausuka ma tja u nomutetaratima kutja kombunda yozongondjero zokuhandurisiwa ape nḓeri kombando’ zombura omurongo, ma tjangasana nandarire na ingwi Schlettwein omuini otutuu otuwondja, ndino ndi ma zuu muye kutja kape na ehi romahandurisiro. 

“Oministera tji mai tja kape notjimariva tjokuranda omahi ngunda ape nozosarama nḓeri uriri mu mu hi novandu nḓa tjiti ozombura nḓu maze i komurongo notjihupe?” Kambausuka wa temwa na pura kutja: “Okutja ozo ze undja ooKandombere poo ze undja uṋe?”  Na tja okuhina otjimariva ku maku hee Schlettwein etiku uriri kaparukaze.