Kae Maṱunḓu-Tjiparuro 

Embo ohunga nongwatero nongwatero nomekuriro ngandu kondjeto nongarero yo muyaruke Ombara Otjitambi yOvaherero, Vekuii Rukoro, mari tjiukisiwa kotjiveta.

Oritjatatu ndi mari yende mondivitivi yotjihuro tja Tjomuise petuwo rombongo ndji yOkatorika momuvanda imbwi Omandume Ndemufayo. Ovatjange varo ozonongo Rukee Tjingaeṱe na Vitura Kavari, momueze outjahambombari, Suramazeva,  otji va yakura omambo omatenga nga manuka okunḓurukwa konganda ndji Otypoprinta. 

Ena rembo Oruveze nOmuinyo wa Rukoro, eye mo-2021 tja ṱire ngwa ri Ombara Otjitambi yOvaherero. 

Ovatjange mba katuwa pehi otjovandu mbe rihonga okuwonga nokutjanga ozombuze ngunda Onongo Tjingaeṱe e rihonga okutjanga omaserekarerwa omakongorerasane. 

Pomatjiukisiro wembo ndi Oritjatatu ndi mari yende mape kara ovaheṋendu vetatu ngandu ku vane mbe riresa okuhungirira koura waro ngunda ondjuwo amai paturuka komapura kovatjange varo.

Mekondwa eseinina nu ndi ri rokupata embo ndi, ovatjange kehi yotupa tutano mave tara komayuva omasenina womuyaruke Ombara Otjitambi yOvaherero Rukoro, ngunda amave utire okusasaneka omuano womananeno we waku na ingwi eye ngwa yarukira motjihavero, omuyaruke Ombara Otjitambi Kuaima Riruako. Tjazumba ave tara mongaro pokati ke notjiuru tjehi, Onongo Hage Geingoba. Ave tara ku imbi omuyaruke Ombara Otjitambi Riruako mbye mu rumatisa poo mbye mwesa na vyo otjoviungura poo ozondando zotjiwaṋa. 

Ave tara mu imbi mbyaavi undjirwa komuyaruke Rukoro nu korusenina ave tara momatokero kovanane mongondjero yotjisuta tjOtjiṱiro Otjindjandja.

Omatjiukisiro inga omautiro uriri nu maye handjaka mehi arihe apehe imba pu mape ya ape kara ovanambango nonḓero mu ro. 

Ku mbe hi na ro ngunda Oritjatatu pomatjiukisiro amari randisiwa nu wina mba vaza mave ṋina ouṋingandu wokuriranda kotjimariva tjokehi tji tji he ri ihi nai tji ri kosa pozonganda pu ri randisiwa.