Kae Maṱunḓu-Tjiparuro
“Okutja ove Blair kara nEhi rOvaingirisa roye ami ndjesa mbi kare nOzimbambwe yandje.”
Omambo nga ya tenenwe i ingwi ngwari Operesidenda ya Zimbabwe, omuyaruke Robert Mugabe, mOndundumehi mOsouth Afrika mo-2002 pombongarero youye yevaverwa. Tja hungama ondota omerirungiro wehi ra Kakazona, Ounited Kingdom, mozombosa za Kuruwo za Zimbabwe. Tjinene omakamburiro wehi kotjomasa kOvavapa nokuhina otjisuta.
Okuza kehi tjingero, mOsouth Afrika maku zu omambo warwe wondando yokuyenda komurungu okuza komunane warwe wa Afrika mousemba we omuni, nu wa Namibia omukazendu omunane wombazu. Omunane ngwi onguri Ombara Otjitambi Aletha Karikondua Nguvauva. Nguri mOdurbana otjihuro ohongora tjOrukondwa rwa Kwazulu-Natala. Pombongarero ndji mai tjiukwa otjo: Okupangiṋa Ovanane Vombazu Vovakazendu kOmekurisiro mOmbuiko nOmbwiro yOtjiwaṋa Okutuurungira mOzokoporativa.
Womambo ape nga tjama na ingo wa Mugabe, kutja owe kaye hungamene rive nu wina kamaaye tende rive, oyo ngu maye raisa ozongari ze oukukutu okuhina kuuhara ama ivaiva poo okutara kombunda poo meṋe, otjomukazendu okusekamena ozonḓero ze, nḓe ri wina ozonḓero zovakazendu avehe nokuzetwara komurungu noondarire kutja mondjira mu novikee pwite. Tjinga ovipwite ovingi mozondjira zawo avehe a vya tuwa mo i yovarumendu. Ovarumendu nandarire nai oviwaṋa avihe tji vya haṋika otja tji vya haṋika nai, vya haṋwa i wo.
Ombara Nguvauva munao otja tanda kutja ke nonguta me yesa kongotwe mOsouth Afrika, nungwari ma toora kangamwa ndji ma yenene okutoora okuyeterera kOnamibia. Tja va za mOnamibia kenewe meeku resa kekwao nu ma hakayene ku novakwao ve kambure pamwe otjiungura hi tjomambo wombongarero ndji pu maye hee, kokutunduuza ovakazendu mombwiko na mombwiro yotjiwaṋa okutuurungira momananeno wombazu.
Umwe, movengi Ombara Nguvauva ngu mave vetasana oviṱuve Oministera ya South Afrika momberoo yoperesisenda yoviuṋe vyOvakazendu, Omitanda nOvaremane, Nkosazana Dlamini-Zuma.
Kape newe mari sewa kekwao…Ombara Otjitambi yOvambanderu, Aletha Karikondua Nguvauva, ma tja, tja kotoka mOnamibia okuza kOsouth Afrika mokutunduuza ovakazendu. Eye u ri pu na Nkosazana Dlamini-Zuma.