KATIMA MULILO – Likwambuyu walitaba zamabasi Albert Kawana ususuelize balipisinisi, kubona museto okwaluzwi cwalecwale wa Katima Mulilo kusebeza lihola zamashumi amabeli kazene, kuba kolo yalitaba zalipisinisi ni litekisano. Kono bakwaezi balimotikala zetuna zelonga libyana, bakupile bamulao kubeleka katata kwamuseto ni mwamubu okauhanya linaha zepeli. Kawana ni likwambuyu walikolo leli swana wanaha Zambia Jack Jacob Mwiimbu, hamoho neba patalalize kukala kusebeza kwamuseto kalihola ze 24 za lizazi. 

Makwambuyu mwa zezahalo yatabo Labubeli nebaize babata kubona kekezo yalitekisano mwahala Namibia, Zambia ni DRC. Mukulo walitekisano wa Walvis Bay-Lubumbashi, kimukulo obonahala kuhula kapili mwanaha Namibia. Kawana ulumela kuli patalazo yeo ika hulisa litekisano ni lipisinisi mwalinaha zepeli.

 “Sicaba sa lipisinisi baka kona kueza lipisinisi mwahala linaha zepeli mwalihola ze 24. Sina muambo otwi ‘nako ki masheleñi’, kacwalo taba yeo haina kusebeza kwa museto wa Katima Mulilo kakuli lisebelezo likabe likwaluhile lihola ze 24. Bakwaezi balimotikala zelonga libyana habasana balobala famuseto kulibelela kulukululwa kakusasa museto haukwalula. Libyana zetokwiwa ni lisebelezo likana liyo fita kanako,” nekubulezi Kawana.

Nihaike kuli sibaka kofumaneha museto kukonisa linaha zepeli kubabaza silikani sa litekisano, Kawana nabonisize kuli litifo za balipisinisi lika nyinyifala bakeñisa kuikabela lisebeliso. “Linaha zaluna zepeli li ezize kalulo yateñi; seli nako yakuli balisipinisi zakwamukunda baeza kalulo yabona. Nilumela kuli likamba la Walvis Bay lika fumana sesiñwi fateñi. Kalibaka leo nikupa bababeleka kwa likamba kusebelisa kolo yeo nikubona kuli nako yabona yasenyiswa kaswanelo,” nabulezi. Mwiimbu naize museto kusebeza lihola ze 24, utaleleza milelo yanaha Zambia. “Kusebeza kwamuseto lihola ze 24 kubapala kalulotuna mwakuhulisa tekisano yalifasi la Afrika, mwakuzamaya kwa libyana ni lisebelezo, kubisa bunolo kuzamaya kwabatu ni masheleñi,” nabulezi. Pili kukwalulwa kwaseto kalihola ze 24 bakwaezi nebasebelisa mubu omwahala linaha zepeli kupumula, museto  haukwala ka 18h00 kuisa haukwalula ka 06h00. Nebaize nebanze bauzwezwa kimasholi mi bakupile bamulao kutatulula taba yeo. Kawana naize “bababona zasilelezo babone kuli libyana hali uzwiwi bakwaezi habalibelezi kulukululwa.”