ǂUrusib ministeris !aroma ǀhaob ai a ǂnûiǂuisa N$10.9 biljunsa xus ge N$267 miljunsa Kunene ǀkharisi ǂurusib !âba a ǂnûiǂuibasa.
Nēs a dībasa ǂâibasens ge ǁnā kharib !nâ tsî !hūb a ǂhabase ǂurusib !oabade māsa ǀgaiǀgaisa.
Ministeri ge !nariǂoasarideb go ūhâ i soab ai nēsa ge mî, ǂkhawusa ǁanǂgāsaben tsîn nî ǂgaoǀkhāsa !harib ai hâ ǂurusib !oabade ǁaeb ai !khō!oas a ǁîn ǁgūbadi di ǀgui !khaisa.
“Namibiab !nâ da ge sida ǀgaisase a ǁaxa tsî ra sī!nâ ǂurusib !oabade hoa Namibiaǁîn !aroma khoraǂuisa, !gōsase ǁnān ha !garo!ā ǀhûhâsigu !nâ hâna.
ǂAn!gâ da ra !khais ge ǂguin hîa !garo!ā !â ǁanhân !aroma di ǂurusib !oaba!khaide ǁîna xu kaise a !nū tsî nēs xa ra !aromahese ǁaeb ai ǂurusib !oabade ǂhâbasa i ra ǁaeb ai a sī!nâ ǁoa !khaisa, tib ge shangulaba ge mî.
Shangulab ge ai!â ge mî, ministeris ra !âhuru-aon, Hoa !Hūbaisi ǂUrusib !Nans (WHO) tsî Jabanni ǂhanub hâra khami hân kha ǀûs ose sîsensa in ǀkharisise ra khoraǂuisensa ǁōna oresa hōba.
ǂUrusib !oabade mās !aroma ra dīhe !nariǂoasaridi !nâ-i ǀae-ao-e ǁnāpa a ae!khōhe ǁoa ae-e nî ūhâs kara, o-i ge ǁî-e kliniks, ǂurusib !oaba!khaib tamas ka i o ǀaeǁgâub ǁga ra ǁnaeǁgauhe.
Nēb ge ǁnaeǁgaudi ra dī!nâhe saoguba.
Nēti ī ǂurusib !oabadi îbe a !garo!ā tsî nau ǂurusib !oaba!khaina xu !nūse ǁanhâ ǀhûhâsigu !aroma ra mâihe, nēs ge ǀhûhâsigu ǁanin ǀkha ra hâ ǁgamǁaredi tsî daoǁgaudi khao!gâ ra sao.
Orotjitombo !garo!ās tsîn ge ǀgui nēti ī ǂurusib !oabadi !aroma a ǁgauǂuisasa. Shagulab ge ge mî “Ministeris ge asa ǂurusib !oabade kuru tsî ǀnaimâdi tsîna ra !gâi!gâi!nâ.
Epupa kliniks di ǂnuwihes ge aiǁgaus nē ai!gû ra sîsengu disa.
Nē kliniks di ǂnuwihes sîsengu ge 25 ǀKhūǁkhâb 2014ǁî kurib dis ai N$11.4 miljuns ai ge tsoatsoa tsî ǀaweǁguiba !oa 25 ǀKhūǁkhâb 2015ǁî kurib dis ai nî ǀam ge is ge, xawes ge !hau!hausase nē kontaraksa ǀKhūǁkhâb 2016ǁî kurib dis ai !gâi ǂâu tama sîsengu !aroma ge ǀamǀamhe.”
ǁÎb ge mîs ge ǀasa kontaraks ge Gamaǀaeb 2022ǁî kurib dis ai N$9.7 miljuns ai māǂuihesa.
Outjob, Khorixas tsî Opuwos di ǀaeǁgâugu !aroma i ge !anuǂoab ǀgaiga ǀgaiaisa N$2.5 miljuns ai ge dītoahe.
WHO’s di mâisas, Mary Brantuos ge ge mî, ǁîs ra !gâîaǂgao !khaisa mûmûsa ǂurusib !oabadi hîa tarekhoedi tsî ǀgôarona ǂurusib !oabade sī!nâs !aroma a ǁawoǁawosa !khais ǂnamipe.