Charles Ndeumane

Omukwashigwana okwa hulitha sho anuwa a tsuwa nombele mombamba yoshipala kOmungola mukwao.

Omukuluntu gwopolisi moshitopolwa shaMusati Isamael Basson okwa ti oshiningwanima shika osha ningwa mEtiyali lyoshiwike shika pethimbo omufekelwa na nakuninga oshihakanwa ya li ta ya zi kolukanda lwaNandjamba moshikandjohogololo Okalongo. Nakusa oye Ndandinifa Helia Ndeipanda (24). Omufekelwa Abraham Junias (34) okwa tulwa miipandeko, nomakonakono gopolisi ota ga tsikile.

Moshipotha sha yooloka shonkambadhala yedhipago, omugameni gwomaliko okwa tuswa noku ehamekwa nombele pethimbo ali ta tula po elandulathano momusholondondo gwaantu mboka kwa li ta ya shangitha uukala wawo woongodhi koMCT mUutapi.

Twamoneni Abnel Katamba (23) ngoka ha longele ehangano lyokugamena omaliko lyoWindhoek Security Services okwa li ta tula po elandulathano sho omufekelwa a tindi okuya momukweyo e ta tameke oku mju lwitha. Katamba okwa tsinene omufekelwa nombonde yomuku, nomufekelwa okwa kutha mo ombele yokapi etemu tsu lwomoshinena oshowo konyala yokolulyo. Nakuninga oshihakanwa okwa ehama noonkondo.

Omufekelwa okwa mangwa po noku li momake gopolisi.

Moshipotha shilwe shuufuthi yaali ya homata oya ponokele omugameni gwomaliko poMudakadaka sport bar and mini market momukunda Ohakadu moshitopolwa shaMusati e eta ya yakamo iinima yongushu iina yi tseyika natango.

Shi ikolelela kolopota yopolisi, aafekelwa oya ulike omugameni gwomaliko nondjembo yombistoli, eta ye mu manga noshilapi komeho oshowo komaako noku mu kutha ondjembe ye yiilonga.

Oya teya po omakumba poositola, eta ya teya eshina lyojekipota noku kutha mo iimaliwa mbyoka ya li mo.

Aafekelwa inaya monika, ashike oompadhi dhawo shodha landulwa okwa monika kutya oya londo mohauto ndele ta ya hingi yuuka moAngola.

-mrndeumaneraycharles@gmail.com