Omukiintu gwomimvo 24 adhika ta landitha okapana, konima ashike yoowili dhontumbu she a ekelehi okanona ke kokakadhona komvila yimwe.
Omukiintu nguka okwa tegelelwa a holoke mompangulilo yamangestalata moWalvis Bay.
Inspekta Iileni Shapumba okwa ti, okanona oka adhika oko akeke, momavi taga ithanwa eedunes oko akeke, konyala oshinano shoometa tadhi tengenekwa po200, okuza koWalvis Bay oku uka kokoSwakopmund, lwopotundi 07h00 Olyomakaya.
Okanona hoka anuwa okali kiitsuwa komuntu a li ta e nde po, ngoka a tseyithile opolisi mbala.
Otaku hokololwa kutya okanona hoka okaadhika ka siikilwa nawa nekumbatha ka zalekwa iikutu yuutalala.
Okwa lopotwa kutya okanona hoka inaka adhika ka ehamekwa, naanambelewa yokuuministeli wokakwashikekookantu oya tseyithilwa, ngaashingeyi okeli mo make gawo.
Esiku olyo tuu ndyoka sho opolisi ya yi molukongo, a oya adha omukiintu ngoka a ipyakidhila ta landitha okapana momudhingoloko gwoKuisebmund.
Otaku hokololwa kutya omukiintu ngoka okwa mangwa po oshoka okwa thigi okanona mehala lya nika oshiponga.
Opolisi oya kala noku tseyithila oshigwana shi kale aluhe tashi thigi uunona po mahala geli nawa noga gamenwa mpoka itau vulu okumonena po oshiponga, ngaashi iipangelo, poosasiona yopolisi, poongeleka nenge pomagumbo mpoka pena aantu, ihe haku e kelahi aanona momapandaanda nenge miishana.