Oshilyo shopaliamende Natangwe Ithete otashi popile ekuthepo lyomusinda omutiligane opo ku kwashilipalekwe kutya aanafalama mboka ye li kondje yomusinda omutiligane oye na ompito mongeshefa yiimuna. Omusinda omutiligane, ngoka gwa totelwe po mo1896, ogwo ongamba yahugunina ndjoka ya topola onooli kiitopolwa yuushimba. Oya kwatela moOshana, Kavango Uuzilo naKavango Uuninginino, Omusati, Zambezi, Kunene, oshowo Oshikoto. Nguka ogu li gumwe gwomomikalo dhokukeelela etaandelo lyomukithi gwelaka nekondo oshowo omikithi omikwawo dhiimuna. Ithete okwa ti omipopyo dhe inadhi kwatakanithwa nopolitika oshoka iilyo ayihe yegumbo yopaliamende osho yu uvite ngaaka.

“Uudhigu wetu moshinima shika owa faathana notanda ku kwashilipaleke kutya kohi yelelo lyandje, okomitiye yandje otayi ka hwahwameka opaliamende yi taambe ko eindilo lyoye nokukwashilipaleka kutya omusinda omutiligane ogwa za po,” oshilyo shopaliamende shongundu yoSwapo osho sha popi ngaaka kOpuwo mOmaandaha pethimbo ya li moshigongi shomauyelele naamboka ya gumwa moshitopolwa shaKunene, shoka kwa li sha unganekwa kokakomitiye kopaliamende ke na sha nomahupilo noshowo iilonga yopambelewa, hoka ke li kohi yelelo lye.

Ithete okwa ti ke shi wo kutya ondhalate otayi kuthwa po uunake, ashike oya tegelela etokolo lyi na sha nomusinda omutiligane sha landula oonkundathana dhawo.

“Molopota yetu, otatu unganeke opo iilyo ayihe yopaliamende yi hogolole opo ondhalate yi ze po,” Ithete osho a popi. Oonkundathana odha longekidhilwa aanafaalama yokOwambo yomiitopolwa ngaashi Omusati, Oshana, Ohangwena, nOshikoto momasiku 12 sigo 18 May 2024. Oonkundathana odhe etithwa komukandakemo gwa gandjwa kehangano lyiipambele yopantu tali ithanwa Lisha Empowerment and Development (eyambulepo nehumokomeho) mo2022, ngoka gwii ndile opo ku yambulwe po omangeshefelo gaanafalama yomOwambo meendelelo. Ithete okwa ti omusinda omutiligane ogwa kala nokuhepeka aanafaalama ethimbo ele noonkondo noonkundathana kombinga yoshinima shika inadhi kandula po omukundu moomvula 30 dha piti. Joseph Janze, omunafalama mOwambo, oku na uudhigu wa faathana, u uvite kutya ngele epangelo olya hala okukandula po uudhigu womusinda omutiligane, nali tameke okukutha po ondhalate oshinano shookilometa 50 kehe konima yoomvula 10. Janze oku wete kutya oonkundathana ndhika otadhi tsikile sigo oomvula 30 komeho, shoka tashi ehameke ongeshefa yonyama noku yi yuga ompito yokumona iiyemo yi li nawa.