Omulumenhu weedula 52 okwe limangeleka konima eshi a denga ohonda yaye Etivali momukunda Okambuwa moshitukulwa shaShikoto.
Nakufya okwa tongololwa kutya oye Paulus Ndapuka omukalimo womomukunda Okambuwa.
Omupopiliko wopolifi moshitukulwa shaShikoto Ellen Nehale okwa hokolola ta ti Ndapuka okwa hanga omukainhu oo e na naye ekwatafano lopaiholee meumbo konima eshi a dja keendingosho.
Okudja opo vati Ndapuka okwa tameka ta denge omukainhu oo ndele noku mu dedaula medu fiyo ta te mu monifa oshiponga kokwooko.
Opolifi oya ti konima yoshiningwanima omukainhu okwa ya koshipangelo a ka mone epango lopaunamiti.
Eshi a ka aluka koshipangelo okwa hanga Ndapuka e li meemhango a fya eshi e limangeleka koshi yomuti u li mepya lambulavo.
Opolifi oya ti omulumenhu ou nomukainhu waye kava li va hombola ashike ova kala hava di pamwe meumbo lavo, vo ove na nokaana kamwe.
Omukainhu okwa lopota oshiningwanima eshi.
Nakufya ina fiya po omukanda washa tau yandje ouyelele kombinga yefyo laye nomakonakono opolifi otaa twikile.