ENGELA - Eefikola dihapu di li moshitukulwa shaHangwena ode lihanena omwaalu wovanafikola vahapu vehe na oufemba wopashiwana.
Okwa hokololwa kutya vahapu vomuvo ove na ovadali vehe na ko nasha voo vamwe kave shi efimano loufemba. Vamwe eefiye, ovadali vavo oveva fiyapo vehena eedjapo domadalo.
Omukulunhufikola umwe womeefikola di na ounona vehe na oufemba David Nehemia okwa tumbula kutya ounona vahapu ove na ovadali vehe na oufemba. “Ngeenge ovadali keve na oufemba, ounona ovo nee tava kala ve na oufemba? David ta ti.
Okwa twikila kutya ounona vahapu ove li mefiloshisho lovakulupe omanga ovadali vavo tava tondauka nOshikango. Ovadali vamwe vati nghee va ile moAngola kave hole okudja mo ve uye va ningile ounona wavo oufemba. Vamwe ovadali vavo Ovaangola omanga ve na ounona va dalelwa moNamibia, eshi hashi kala shidjuu kuvo vati okuningila okanona oufemba. Vahapu vati nghee va fadukilepo ounona vavo keve na apa tava tuwa.
David okwa hokolola kutya vahapu paife ove shi ninga omukalo ndjikilile okudolopela ovakulupe ounona ndele tava faduka po. “Ovakulupe ohava kendebala okushashifa ounona ava opo va dule okumona oukalata vomashasho ile oukalata voshipangelo opo va dule okutamekifa ounona ofikola,” David ta tumbula.
David okwa ti paife onghalo ya tya ngaha oya ninga omukalondjikilile neefikola ohadi tambula ashike ounona vehe na oufemba shaashi vati ihashi dengele. Okwa twikila kutya eshi ohave shi ningi opo va alule ounona momapandavanda oshoyo okuninga oihakanwa yomalodu noingangamifi. “Yee keshe omunhu oku na oufemba okukala a hongwa,” ta weda po.
Omukulunhufikola okwa twikila kutya oshiningwanima ohashi ka kala endangalati lakula mondjila younona opo va dule okuya komesho. Vahapu vomuvo ohava kala ve na omaano ashike ihava pitikwa va shange ekonakono lakula londodo 11 oshoyo 12 shaashi kave na oufemba woshilongo.
Omukulunhu wehongo moshitukulwa shaHangwena Isack Hamatwi okwa yelifa kutya ounona vahapu ova imbwa okuya koiputudilo yopombada molwokuhena oufemba. Okwa popya kutya vamwe ohava kala va pita nawa eengudu dopombada, va filwa nande onghenda va shange ekonakono ashike ihava dulu okuya koiputudilo yopombada vehe na eedjapo domadalo oshoyo oumutwe.
Hamatwi ota kunghilile ovadali aveshe ava ve na ounona vehe na oufemba va ka ningile ounona oufemba. “Ounona ava ova pita okuninga oihakanwa yedundakano lomadilaadilo oshoyo yo ominyonena deenghalamwenyo davo ngeenge ova i komesho vehe na omaufemba,” Hamatwi ta tumbula.