Eshi kwa didilikwa kutya oshikandjohoololo shaKongo, Oshikunde, nEpembe oyo imwe ya talela eshongo linene lomeva okunwa, ounimisteli wonamapya owa tameka noilonga yokutunga odama neembola domeva momukunda Omulondo moshikandjohoololo shaShikunde Etitano.
Moshipopiwa shaye minista younamapya omeva, netululilo lomadu Calle Schlettwein okwa ti osha fimana ngeenge oshiwana komikunda nanso tashi nu omeva mayela.
Minista okwa ti elalakano lokupatulula oilonga yokutunga odama neembola olo ku andjeneka omeva moikandjohoololo ngaashi Epembe, Oshikunde nosho tuu oikandjohoololo ikwao ya yooloka yomoshitukulwa shaHangwena ei ina oshiwana hashi teke meendungu momifima nomeembola dina omeva hai dulu okulongifwa kovanhu.
Okwa ti oilonga otai ka longwa melongelokumwe nehangano lokuyandjeneka omeva moshilongo loNamwater.
Schlettwein okwa ti epangelo otali lalakanene okuyandja omeva komikunda nokeedoolopa opo kukwashipaleke kutya oshiwana oshi na omeva ayela okunwa.
Minista okwa ti ngeenge oilonga yokutunga odama neembola oya pu, eenhele ngaashi Omafo-Eenhana, Omakango – Onambutu Eenhana ota di kale dina omeva mahapu ayela.
Efiku tuu olo mEtitano minista okwa patulula yoo vali oilonga yokutunga ocanal kaShakati opo ka dule okuyandjaneka omeva mahapu kovakalimo vomeedoolopa dokonooli.
“Odoolopa ya Shakati oyo imwe ya kula koonoli hai yandjaneke omeva koshiwana onghee naashi osha eta opo tu kale twa patulula oilonga yokutungulula ocanal kaShakati shaashi okwa didilikwa iha ka dulu vali okuyandja omeva a wana kovanhu,” minista ta ti.
Moshipopiwa shaye kansela woshikandjohoololo shaShikunde Lonia Kaishungu okwa ti oshikandjohoololo shaye oshi na ovanhu 20 000 nomikunda 81,
ashike otava mono oixuna konghalo yenota eshi hava kala tava ende eendjiladiledile tava ka teka keendungu ile momifima.
Kansela okwa ti ovanhu vamwe ohava
teke meendungu dina omeva malula onghee eshi oshili eshongo linene la talelwa komikunda domOshikunde.